ന്യൂഡല്ഹി: രാജ്യത്ത് ഫെബ്രുവരിയോടെ ഓക്സ്ഫഡിന്റെ കോവിഡ് വാക്സിന് ലഭ്യമാകുമെന്ന് സെറം ഇന്സ്റ്റിറ്റ്യൂട്ട്. 2021 ഫെബ്രുവരിയോടെ ആരോഗ്യ പ്രവര്ത്തകര്ക്കും പ്രായമായവര്ക്കും ഓക്സ്ഫഡിന്റെ കോവിഡ് വാക്സിന് ലഭ്യമാകും. ഏപ്രിലോടെ പൊതുജനങ്ങളിലേക്ക് കോവിഡ് വാക്സിന് എത്തിക്കും. രണ്ടു ഡോസ് വാക്സിന് 1000 രൂപ വിലവരുമെന്നും സെറം ഇന്സ്റ്റിറ്റ്യൂട്ട് ഇന്ത്യന് സി.ഇ.ഒ അഡാര് പൂനവാല അറിയിച്ചു.
റെഗുലേറ്ററി അനുമതി ലഭിക്കുന്നതിന് അനുസരിച്ചായിരിക്കും വാക്സിന് വിതരണം. 2024 ഓടെ എല്ലാ ഇന്ത്യക്കാര്ക്കും കോവിഡ് വാക്സിന് ലഭ്യമാക്കുമെന്നും ഹിന്ദുസ്ഥാന് ടൈംസിന്റെ ലീഡര്ഷിപ്പ് സമ്മിറ്റില് അദ്ദേഹം പറഞ്ഞു.
ഏകദേശം രണ്ടുമൂന്ന് വര്ഷം എല്ലാ ഇന്ത്യക്കാര്ക്കും കോവിഡ് വാക്സിന് ലഭ്യമാക്കാനെടുക്കും. വിതരണം, ബജറ്റ്, വാക്സിന് ലോജിസ്റ്റിക്സ്, ജനങ്ങളുടെ സന്നദ്ധത ഇതെല്ലാം വാക്സിനേഷനെ സ്വാധീനിക്കുമെന്നും അദ്ദേഹം കൂട്ടിച്ചേര്ത്തു.
ഒാക്സ്ഫഡ് -ആസ്ട്രസെനക വാക്സിന് ഫലപ്രദമാണെന്ന റിപ്പോര്ട്ടുകള് പുറത്തുവരുന്നുണ്ട്. മുതിര്ന്നവരിലും ഫലപ്രാപ്തി കാണുന്നു. യാതൊരു പാര്ശ്വഫലങ്ങളും ഇതുവരെ റിപ്പോര്ട്ട് ചെയ്തിട്ടില്ലെന്നും അദ്ദേഹം വ്യക്തമാക്കി.