ഇന്ത്യന്‍ പ്രവാസികള്‍ക്ക്‌ ഇനി മുതല്‍ അവര്‍ താമസിക്കുന്ന രാജ്യങ്ങളിലെ മേല്‍വിലാസം പാസ്പോര്ട്ടില് ചേര്‍ക്കാന്‍ ഇന്ത്യന്‍ കേന്ദ്രമന്ത്രാലയം അനുമതി നല്‍കി. പുതിയ പരിഷ്‌കരണവുമായി ബന്ധപ്പെട്ട് കേന്ദ്രസര്‍ക്കാര്‍ തീരുമാനമെടുത്തതായി ദുബായ് ഇന്ത്യന്‍ കോണ്‍സുലേറ്റിലെ പാസ്‌പോര്‍ട്ട് ആന്റ് അറ്റസ്‌റ്റേഷന്‍ കോണ്‍സുല്‍ സിദ്ധാര്‍ത്ഥ കുമാര്‍ അറിയിച്ചു.
സ്വന്തം കെട്ടിടത്തിന്റെയോ വാടകക്ക് താമസിക്കുന്ന കെട്ടിടത്തിന്റെയോ വിലാസമാണ് വേണ്ടത്. ഏതെങ്കിലും ഒരു വിലാസം മാത്രമേ നല്‍കാന്‍ കഴിയൂ. വാടക കരാര്‍, ആധാരം, ടെലഫോണ്‍ ബില്‍, ദേവ/ഫേവ/സേവ ബില്‍ തുടങ്ങിയവയാണ് രേഖകളായി നല്‍കേണ്ടത്.
ഇന്ത്യയില്‍ സ്ഥിരമായ മേല്‍വിലാസമില്ലാതെ വര്‍ഷങ്ങളായി യു.എ.ഇയില്‍ താമസിക്കുന്നവര്‍ക്കടക്കം പുതിയ തീരുമാനം പ്രയോജനപ്പെടും. അവര്‍ക്ക് ഇനി മുതല്‍ പ്രാദേശിക മേല്‍വിലാസമായി വിദേശ രാജ്യങ്ങളിലെ വിലാസം ചേര്‍ക്കാം. എന്നാല്‍, നിലവിലെ പാസ്പോര്ട്ടില് ഈ മാറ്റം അനുവദിക്കില്ല. മാറ്റം ആവശ്യമായവര്‍ പുതിയ പാസ്പോര്‍ട്ടിന് അപേക്ഷ നല്‍കണം. അതോടൊപ്പം വിലാസവും മാറ്റാം. ദിവസവും ഇത്തരം നിരവധി അപേക്ഷകള്‍ വരുന്നുണ്ടെന്നും ഇവ പരിഗണിക്കുമെന്നും കോണ്‍സുലേറ്റ് അറിയിച്ചു.
