ദുബായ് എക്‌സ്‌പോയിലെ ഇന്ത്യാ പവലിയനില്‍ കേരള വീക്കിനോട് അനുബന്ധിച്ച് നടന്ന വാര്‍ത്താസമ്മേളനത്തില്‍ സംസാരിക്കുകയായിരുന്നു ടൂറിസം മന്ത്രി
ദുബായ് : കേരളത്തിലെ വിനോദ സഞ്ചാര സാധ്യതകള്‍ ഉപയോഗിച്ച് പൊതു-സ്വകാര്യ പങ്കാളിത്തത്തോടെ പുതിയ പദ്ധതികള്‍ ആവിഷ്‌കരിക്കുമെന്ന് കേരള ടൂറിസം പൊതുമരാമത്ത് വകുപ്പ് മന്ത്രി മുഹമദ് റിയാസ് പറഞ്ഞു.
ഇതിനായി പ്രവാസികളില്‍ നിന്നും യുഎഇ കമ്പനികളില്‍ നിന്നും നിക്ഷേപം ക്ഷണിക്കുമെന്നും മന്ത്രി പറഞ്ഞു.
സര്‍ക്കാര്‍-സ്വകാര്യ പങ്കാളിത്തം കേരളത്തിലെ സമസ്ത മേഖലകളിലും കൊണ്ടുവരും. ഇത് പ്രവാസി നിക്ഷേപകര്‍ക്ക് വലിയ സാധ്യതയാണ് തുറക്കുക.
കേരളത്തിന്റെ ടൂറിസം ബ്രാന്‍ഡ് അംബാസഡര്‍മാരായി മാറാന്‍ പ്രവാസികള്‍ക്ക് കഴിയണമെന്നും മന്ത്രി പറഞ്ഞു.
താല്‍പര്യമുള്ള പ്രവാസികള്‍ക്ക് കേരളത്തിന്റെ ടൂറിസം വകുപ്പുമായി സഹകരിച്ച് പദ്ധതികള്‍ നടപ്പിലാക്കാം. പ്രവാസി പങ്കാളിത്തത്തിന് പ്രത്യേക താല്‍പര്യമുണ്ട്.
കാരവന്‍ ടൂറിസം, പോലുള്ള പുതിയ സാധ്യതകള്‍ക്ക് പ്രോത്സാഹനം നല്‍കും അറിയപ്പെടാത്ത ടൂറിസം കേന്ദ്രങ്ങളുടെ വികസനം, സാഹസിക ടൂറിസം, മലബാര്‍ മേഖലയിലെ ടൂറിസം സാധ്യതകള്‍ എന്നിവയിലെല്ലാം വലിയ നിക്ഷേപ സാധ്യതകള്‍ ഉണ്ട്. ആയുര്‍വേദ ചികിത്സയുമായി ബന്ധപ്പെട്ട സൗകര്യങ്ങള്‍ യുഎഇയില്‍ നിന്നുള്ളവര്‍ക്ക് പ്രയോജനപ്പെടുത്താനുള്ള അവസരം ഉണ്ടാകും.
ചുവപ്പുനാടയില്‍ കുടുങ്ങാത്ത കാലതാമസം ഇല്ലാത്ത അനുമതികള്‍ ടൂറിസം പദ്ധതികള്‍ക്ക് നല്‍കും സംസ്ഥാനത്ത് നിക്ഷേപ സൗഹൃദ അന്തരീക്ഷം നിലവിലുണ്ടെന്നും മന്ത്രി പറഞ്ഞു.
