Web Desk
വ്യാജ വിവാഹ വാര്‍ത്തയ്‌ക്കെതിരെ കടുത്ത മറുപടിയുമായി നടന്‍ ബാല. ഇനി വയ്യ, ഇത് അവസാനത്തെ താക്കീത് ആണ്, ഇവിടം കൊണ്ട് നിര്‍ത്തിക്കോ എന്നാണ് വ്യാജവാര്‍ത്ത പ്രചരിച്ചവരോട് പറഞ്ഞത്. ആറ് വര്‍ഷമായി ഞാന്‍ വേദനിക്കുകയാണ്. എന്റെ മകളെ ഞാന്‍ സ്‌നേഹിക്കുന്നത് പോലെ ആരാണ് സ്‌നേഹിക്കുന്നത്?. ‘ഇനി എന്നെ പൊട്ടനാക്കി ബിസിനസ് നടത്താന്‍ ഞാന്‍ സമ്മതിക്കില്ല. ഒരുപാട് വേദനയുണ്ട്’- ബാല പറഞ്ഞു. ഫെയ്‌സ്ബുക്ക് ലൈവിലൂടെയാണ് താരം ഇക്കാര്യം പറഞ്ഞത്.
എന്റെ അച്ഛന്‍ ആശുപത്രിയില്‍ ചികിത്സയിലാണ്. കോവിഡ് കാരണം ചെന്നൈയിലേക്ക് പോകാന്‍ കഴിഞ്ഞില്ല. ഓരോ നിമിഷവും അച്ഛന്റെ വിവരങ്ങള്‍ വിളിച്ച് അന്വേഷിക്കുകയാണ്. അതിനിടയ്ക്കാണ് ഇത്തരമൊരു വ്യാജവാര്‍ത്ത. ബാല വിവാഹ ജീവിതത്തിലേക്ക് പോകുന്നു എന്ന്…ഇതുകണ്ട് വിളിക്കാത്തവര്‍ ആരുമില്ല. രാത്രി മുഴുവനും കോളുകളാണ്. ഞാന്‍ ആര്‍ക്കും ഇന്റര്‍വ്യൂ കൊടുത്തിട്ടില്ല. ആരും എന്നെ വിളിച്ചിട്ടില്ല.
ഇങ്ങനെ ചുമ്മാ എഴുതി വിടുന്നവര്‍ക്ക് കാശാണ് വേണമെങ്കില്‍ ഞാന്‍ തരാം. പബ്ലിസിറ്റിക്ക് വേണ്ടി ഇങ്ങനെ ചെയ്യരുത്. ഇതെന്റെ അവസാനത്തെ മുന്നറിയിപ്പാണ്. ഏത് ഓണ്‍ലൈന്‍ ചാനല്‍ ആയാലും ഇനി ഞാന്‍ നോക്കില്ല.
