ബെംഗളൂരു: ഏറ്റവും ദൈര്‍ഘ്യമേറിയ ആകാശയാത്ര താണ്ടി എയര്‍ ഇന്ത്യയുടെ വനിതാ പൈലറ്റുമാര്‍ ചരിത്രം കുറിച്ചു. ഉത്തര ധ്രുവത്തിലൂടെയുളള യാത്രയാണ് ഇന്ത്യയുടെ പെണ്‍കരുത്തുകള്‍ പൂര്‍ത്തിയാക്കിയത്. നാല് വനിതകള്‍ നിയന്ത്രിച്ച എയര്‍ ഇന്ത്യയുടെ ബോയിങ് 777 വിമാനം സാന്‍ഫ്രാന്‍സിസ്‌കോയില്‍ നിന്നും 16,000 കിലോമീറ്റര്‍ പിന്നിട്ടാണ് ബെംഗളൂരു വിമാനത്താവളത്തില്‍ പറന്നിറങ്ങിയത്. തുടര്‍ച്ചയായ 17 മണിക്കൂറാണ് നാല് വനിതാ പൈലറ്റുമാര്‍ ചേര്‍ന്ന് വിമാനം പറത്തിയത്.
ഇതാദ്യമായാണ് ഒരു വനിതാ ടീം ഉത്തരധ്രുവത്തിന് മുകളിലൂടെ ഏറ്റവും ദൈര്‍ഘ്യമേ റിയ വിമാന യാത്ര നടത്തുന്നത്. ക്യാപ്റ്റന്‍ സോയ അഗര്‍വാള്‍, ക്യാപ്റ്റന്‍ തന്മണി പാപഗാരി, ക്യാപ്റ്റന്‍ അകാന്‍ഷ സോനാവനേ, ക്യാപ്റ്റന്‍ ശിവാനി മന്‍ഹാസ് എന്നിവരായിരുന്നു വിമാനത്തെ നിയന്ത്രിച്ചത്. ചരിത്രത്തിന്റെ ഭാഗമായതില്‍ അഭിമാനമുണ്ടെന്ന് ക്യാപ്റ്റന്‍ സോയ അഗര്‍വാള്‍ പറഞ്ഞു. സാന്‍ഫ്രാന്‍സിസ്‌കോയില്‍ നിന്നും ബെംഗളൂരുവിലേക്ക് നിര്‍ത്താതെ വന്ന ആദ്യ വിമാനം കൂടിയാണിത്.
