മലപ്പുറം: ന്യൂനപക്ഷ വര്ഗീയതയാണ് കൂടുതല് അപകടമെന്ന സിപിഎം സംസ്ഥാന ആക്ടിംഗ് സെക്രട്ടറി എ.വിജയരാഘവന്റെ വിവാദ പ്രസ്താവനയോട് പ്രതികരിച്ച് മുസ്ലിംലീഗ്. വിജയരാഘവന്റെ പ്രസ്താവന സിപിഎമ്മിന്റെ വര്ഗീയ അജണ്ടയെയാണ് സൂചിപ്പിക്കുന്നതെന്നും സിപിഎമ്മിന്റെ നയമാറ്റമാണിതെന്നും ലീഗ് ജനറല് സെക്രട്ടറി കെപിഎ മജീദ് പ്രതികരിച്ചു.
അതേസമയം ന്യൂനപക്ഷ വര്ഗീയതയാണ് കൂടുതല് അപകടമെന്ന് താന് പറഞ്ഞിട്ടില്ലെന്ന് വിജയരാഘവന് പറഞ്ഞു. പ്രസ്താവന വിവാദമായതോടെ പ്രസംഗത്തെ മാധ്യമങ്ങള് ദുര്വ്യാഖ്യാനം ചെയ്തതാണെന്നും വോട്ടിന് വേണ്ടി നിലാപട് മാറ്റുന്നവരല്ല തങ്ങളെന്നും സിപിഎം സംസ്ഥാന സെക്രട്ടറി പറഞ്ഞു.
ന്യൂനപക്ഷ വര്ഗീയതയാണ് ഏറ്റവും തീവ്രമായ വര്ഗീയതയെന്നായിരുന്നു എ.വിജയരാഘവന് കോഴിക്കോട് പറഞ്ഞത്. മുക്കത്ത് വികസന മുന്നേറ്റ യാത്രയ്ക്ക് നല്കിയ സ്വീകരണ പരിപാടിയില് സംസാരിക്കവേയായിരുന്നു വിവാദ പരാമര്ശം. ഒരു വര്ഗീയതയ്ക്ക് മറ്റൊരു വര്ഗീയത കൊണ്ട് പരിഹോരം കാണാന് കഴിയില്ല. ന്യൂനപക്ഷ വര്ഗായത ഉയര്ത്തിപ്പിടിച്ചുകൊണ്ട് ഭൂരിപക്ഷ വര്ഗീയതയെ ചെറുക്കാന് കഴിയില്ല. ഫലത്തില് അത് ഭൂരിപക്ഷ വര്ഗീയതയുടെ അക്രമങ്ങളെ ന്യായീകരിക്കുകയാണെന്നും ഏറ്റവും വലിയ വര്ഗീയതയായ ന്യൂനപക്ഷ വര്ഗീയതയെ തോല്പിക്കാന് നമ്മള് ഒരുമിച്ചു നില്ക്കണമെന്നും വിജയരാഘവന് പറഞ്ഞു.
