മുംബൈ: ഓഹരി വിപണിയില് നിക്ഷേപക സ്ഥാപനങ്ങളുടെ താല്പ്പര്യം വര്ധിച്ചതിനെ തുടര്ന്ന് തുടര്ച്ചയായി ആറാമത്തെ ദിവസവും നിഫ്റ്റി മുന്നേറ്റം രേഖപ്പെടുത്തി. സെന്സെക്സ് തുടര്ച്ചയായി നാലാമത്തെ ദിവസമാണ് നേട്ടം കൊയ്തത്. കോവിഡ് വാക്സിന് റഷ്യ അനുമതി നല്കിയത് ഓഹരി വിപണിക്ക് ഊര്ജം പകര്ന്നു.
സെന്സെക്സ് 225 പോയിന്റും നിഫ്റ്റി 52 പോയിന്റുമാണ് ഇന്ന് ഉയര്ന്നത്. 38,407പോയിന്റിലാണ് സെന്സെക്സ് ഇന്ന് ക്ലോസ് ചെയ്തത്. 38,556 പോയിന്റ് വരെ വ്യാപാരത്തിനിടെ സെന്സെക്സ് ഉയര്ന്നിരുന്നു. 11,322ലാണ് നിഫ്റ്റി വ്യാപാരം അവസാനിപ്പിച്ചത്. 11,373 പോയിന്റ് വരെ വ്യാപാരത്തിനിടെ എത്തിയിരുന്നു. മാര്ച്ചിലെ തകര്ച്ചക്കു ശേഷം ഓഹരി വിപണി നടത്തിയ മുന്നേറ്റത്തിനിടെ ആദ്യമായാണ് 11,300ന് മുകളില് നിഫ്റ്റി ക്ലോസ് ചെയ്യുന്നത്.
ബാങ്ക്, മെറ്റല് ഓഹരികളാണ് ഇന്ന് പ്രധാനമായും നേട്ടമുണ്ടാക്കിയത്. ഐഡിഎഫ്സി ഫസ്റ്റ് ബാങ്ക് 7.49 ശതമാനം ഉയര്ന്നു. നിഫ്റ്റി ബാങ്ക്, മെറ്റല് സൂചികകള് ഒന്നര ശതമാനത്തിലേറെ നേട്ടം രേഖപ്പെടുത്തി. അതേ സമയം ഫാര്മ ഓഹരികളില് ലാഭമെടുപ്പ് ദൃശ്യമായി. നിഫ്റ്റി ഫാര്മ സൂചിക 1.42 ശതമാനം ഇടിഞ്ഞു.
സീ ലിമിറ്റഡ്, ജെഎസ്ഡബ്ല്യു സ്റ്റീല്, ആക്സിസ് ബാങ്ക്, ബിപിസിഎല്, ഇന്ഡസ്ഇന്ഡ് ബാങ്ക് എന്നിവയാണ് ഏറ്റവും ഉയര്ന്ന നേട്ടം രേഖപ്പെടുത്തിയ അഞ്ച് നിഫ്റ്റി ഓഹരികള്. സീ ലിമിറ്റഡ് 5.14 ശതമാനം നേട്ടം രേഖപ്പെടുത്തി.
ശ്രീ സിമന്റ്സ്, ടൈറ്റാന്, യുപിഎല്, സിപ്ല, ഡോ.റെഡ്ഡീസ് ലബോറട്ടറീസ് എന്നിവയാണ് നിഫ്റ്റിയിലെ ഏറ്റവും നഷ്ടം നേരിട്ട 5 ഓഹരികള്. ശ്രീ സിമന്റ്സും ടൈറ്റാനും മൂന്നര ശതമാനത്തിലേറെ ഇടിവ് നേരിട്ടു. നിഫ്റ്റിയില് ഉള്പ്പെട്ട 33 ഓഹരികള് നേട്ടമുണ്ടാക്കിയപ്പോള് 17 ഓഹരികള് നഷ്ടം രേഖപ്പെടുത്തി.
