ജിദ്ദ: സൗദിയില് അഴിമതിക്കേസില് സ്വദേശികളും വിദേശികളുമായി 65 പേര് അറസ്റ്റില്. സൗദി അഴിമതി വിരുദ്ധ അതോറിറ്റിയാണ് ഇക്കാര്യം അറിയിച്ചത്. കൈക്കൂലി, അധികാര ദുര്വിനിയോഗം, വ്യാജരേഖ ചമയ്ക്കല് എന്നിവയാണ് ഇവര്ക്കെതിരെ ചുമത്തിയ കുറ്റങ്ങള്. പ്രതിരോധ, ആഭ്യന്തര മന്ത്രാലയം മുതല് സൗദി ഫുഡ് ആന്ഡ് ഡ്രഗ് അതോറിറ്റി, ജനറല് അതോറിറ്റി ഓഫ് മീറ്റിയറോളജി ആന്റ് എന്വയണ്മെന്റല് പ്രൊട്ടക്ഷന് തുടങ്ങി വിവിധ മന്ത്രാലയങ്ങളില് നിന്നുളള 48 ഉദ്യോഗസ്ഥരും ജോലിക്കാരും പ്രതികളിലുണ്ട്.
ഈ മാസം അതോറിറ്റി ടീമുകള് നടത്തിയ 460 പരിശോധനകളിലാണ് ഇവര് അറസ്റ്റിലായത്. കുറ്റകൃത്യങ്ങളില് പങ്കുണ്ടെന്ന് സംശയിച്ച 411 പേരില് നടത്തിയ അന്വേഷണത്തില് നിന്നാണ് 65 പേരെ അന്വേഷണ സംഘം അറസ്റ്റ് ചെയ്തത്. നിയമപരമായ നടപടികള് പൂര്ത്തിയാക്കിയ ശേഷം ഇവരെ കോടതിയില് ഹാജരാക്കും. അതേസമയം സാമ്പത്തികമോ ഭരണപരമോ ആയ അഴിമതി സംബന്ധമായ എന്തെങ്കിലും സംശയാസ്പദമായ ശ്രദ്ധയില്പ്പെട്ടാല് അധികൃതരെ അറിയിക്കണമെന്ന് രാജ്യത്തെ മുഴുവന് ജനങ്ങളോടും അഴിമതിവിരുദ്ധ അതോറിറ്റി അറിയിച്ചു. ഇവ ശ്രദ്ധയില്പ്പെട്ടാല് 980 എന്ന ടോള്ഫ്രീ നമ്പറിലോ www.nazaha.gov.sa എന്ന വെബ്സൈറ്റ് വഴിയോ അല്ലെങ്കില് 980@nszaha.gov.sa എന്ന ഇ-മെയിലിലോ 0114420057 എന്ന ഫാക്സ് നമ്പറിലോ അഴിമതി വിരുദ്ധ അതോറിറ്റിയെ അറിയിക്കാം.
