ന്യൂഡല്‍ഹി: കര്‍ശന ലോക്ഡൗണ്‍ ഏര്‍പ്പെടുത്താനുള്ള കേന്ദ്ര സര്‍ക്കാര്‍ തീരുമാനമാണ് ഇന്ത്യന്‍ സമ്പദ് വ്യവസ്ഥയില്‍ ഗുരുതര പ്രശ്‌നമുണ്ടാക്കിയതെന്ന് സുപ്രീംകോടതി. മോറട്ടോറിയം സമയത്ത് വായ്പ തിരിച്ചടവിന് പലിശ ഈടാക്കുന്നതിനെ ചോദ്യം ചെയ്ത് സമര്‍പ്പിച്ച ഹര്‍ജിയില്‍ വാദം കേള്‍ക്കവെയാണ് സുപ്രീംകോടതി കേന്ദ്ര സര്‍ക്കാരിനെ വിമര്‍ശിച്ചത്.
കല്‍ക്കരി കുടിശികയെക്കുറിച്ചും സത്യവാങ്മൂലം സമര്‍പ്പിക്കുന്നതിന് വരുത്തിയ കാലതാമസത്തെ കുറിച്ചും നിലപാട് വ്യക്തമാക്കാന്‍ കേന്ദ്രത്തോട് കോടതി ആവശ്യപ്പെട്ടു. റിസര്‍വ് ബാങ്ക് തീരുമാനം എടുത്തുവെന്ന് നിങ്ങള്‍ പറയുന്നു. കേന്ദ്ര സര്‍ക്കാര്‍ സ്വന്തം നിലപാട് വ്യക്തമാക്കണം. സര്‍ക്കാര്‍ റിസര്‍വ് ബാങ്കിന്റെ പിന്നില്‍ ഒളിക്കുകയാണെന്നും ജസ്റ്റിസ് അശോക് ഭൂഷണ്‍, ജസ്റ്റീസ് എം.ആര്‍ ഷാ എന്നിവരടങ്ങിയ ബഞ്ച് വിമര്‍ശിച്ചു. റിസര്‍വ് ബാങ്കിന്റെ മറുപടിയുമായി മുന്നോട്ടു പോവുകയാണെന്നും സുപ്രീംകോടതി വ്യക്തമാക്കി.
അതേസമയം വായ്പ മോറട്ടോറിയം കേസില്‍ സത്യവാങ്മൂലം സര്‍പ്പിക്കാന്‍ ഓരാഴ്ച്ച കാലാവധി നല്‍കണമെന്ന് സോളിസിറ്റര്‍ ജനറല്‍ തുഷാര്‍ മേത്ത സുപ്രീംകോടതിയോട് ആവശ്യപ്പെട്ടു.
