അമരാവതി: ആന്ധ്രാപ്രദേശില് സെപ്റ്റംബര് അഞ്ചുമുതല് സ്കൂളുകള് തുറന്ന് പ്രവര്ത്തിക്കാന് തീരുമാനിച്ചതായി ജഗന്മോഹന് സര്ക്കാര് അറിയിച്ചു. കഴിഞ്ഞ ദിവസം മാധ്യമങ്ങളോട് സംസാരിക്കവെയാണ് മുഖ്യമന്ത്രി ജഗന്മോഹന് റഡ്ഡിയും വിദ്യാഭ്യാസമന്ത്രി ആദിമുലാപ്പു സുരേഷും ഇക്കാര്യം അറിയിച്ചത്. എന്നാല് വിഷയത്തില് അപ്പോഴത്തെ സാഹചര്യത്തിന് അനുസരിച്ച് അന്തിമ തീരുമാനം എടുക്കുമെന്നും ഇരുവരും വ്യക്തമാക്കി.
കോവിഡ് വ്യാപനത്തിന് ശേഷം ഇതാദ്യമായാണ് സ്കൂള് തുറക്കുന്ന വിഷയത്തില് ജഗന്മോഹന് സര്ക്കാര് തീരുമാനം എടുക്കുന്നത്. അതേസമയം സ്കൂള് തുറക്കുന്നതുവരെയുള്ള ഉച്ചഭക്ഷണവും റേഷനും വിദ്യാര്ത്ഥികളുടെ വീടുകളില് എത്തിക്കുമെന്നും മുഖ്യമന്ത്രി അറിയിച്ചു. അടുത്ത അധ്യയന വര്ഷം സര്ക്കാര് സ്കൂളുകളില് എല്കെജി, യുകെജി ആരംഭിക്കുമെന്നും സര്ക്കാര് വ്യക്തമാക്കി.
രാജ്യത്തെ വിദ്യാഭ്യാസ സ്ഥാപനങ്ങള് ഓഗസ്റ്റില് തുറക്കുന്ന കാര്യത്തില് തീരുമാനമെടുക്കുമെന്ന് കേന്ദ്രസര്ക്കാര് അറിയിച്ചിരുന്നു. എന്നാല് കോവിഡ് കേസുകള് കുത്തനെ ഉയര്ന്നതോടെ ഇതുസംബന്ധിച്ച് പിന്നീട് ഔദ്യോഗിക അറിയിപ്പുകള് ഒന്നും ഉണ്ടായിട്ടില്ല.
