കോവിഡ് മാനദണ്ഡങ്ങള് പാലിക്കാത്തവര്ക്ക് കനത്ത പിഴശിക്ഷ നല്കാന് തീരുമാനമെടുത്ത് സൗദി അറേബ്യ.
റിയാദ് : പൊതുജനങ്ങളുടെ ആരോഗ്യ സുരക്ഷയ്ക്കായി കര്ശന നടപടികള് സ്വീകരിക്കുന്നതിന്റെ ഭാഗമായി കോവിഡ് മാനദണ്ഡങ്ങള് പാലിക്കാത്തവര്ക്ക് കനത്ത പിഴ ശിക്ഷ നല്കാന് സൗദി ഭരണകൂടം തീരുമാനിച്ചു.
മുഖാവരണം അണിയാതെ പൊതുസ്ഥലങ്ങളില് കണ്ടാല് ആയിരം മുതല് ഒരു ലക്ഷം റിയാല് വരെ പിഴ ശിക്ഷ ഈടാക്കാനാണ് പോലീസിന് ആഭ്യന്തര മന്ത്രാലയം നിര്ദ്ദേശം നല്കിയിരിക്കുന്നത്.
മുഖാവരണം ധരിക്കാത്തവര്ക്ക് ആദ്യ തവണ ആയിരം റിയാലും പിന്നീട് കുറ്റം ആവര്ത്തിച്ചാല് ഇരട്ടിയും ഈടാക്കും. ഇത്തരത്തില് ഒരു ലക്ഷം വരെ പിഴ ഈടാക്കാനാണ് നിര്ദ്ദേശം.
സാമൂഹിക അകലം പാലിക്കാത്തവര്ക്ക് ആയിരം റിയാലാണ് പിഴ. 2021 ഒക്ടോബറില് കോവിഡ് കേസുകള് കുറഞ്ഞതിനെ തുടര്ന്ന് പ്രതിരോധ കുത്തിവെപ്പ് എടുത്തവര് പൊതുസ്ഥലങ്ങളില് മുഖാവരണം ധരിക്കേണ്ടതില്ലെന്ന ഇളവ് നല്കിയിരുന്നു.
എന്നാല്, കോവിഡ് കേസുകള് കൂടി വരുന്ന സാഹചര്യത്തില് കടുത്ത നിയന്ത്രണങ്ങള് ഏര്പ്പെടുത്തണമെന്ന ആരോഗ്യ വകുപ്പിന്റെ ആവശ്യത്തെ തുടര്ന്ന് ആഭ്യന്തര മന്ത്രാലയം കര്ശന നിയന്ത്രണങ്ങള് ഏര്പ്പെടുത്താന് തീരുമാനിക്കുകയായിരുന്നു.
2021 ഒക്ടോബര് മാസമാണ് സൗദിയില് ഇളവുകള് നല്കിയത്. വിവാഹങ്ങള് ഉള്പ്പടെയുള്ള ചടങ്ങുകള് നടത്താനും മറ്റ് പൊതുപരിപാടികള്ക്കും അനുവാദം നല്കിയിരുന്നു. കോവിഡ് കേസുകള് പ്രതിദിനം ശരാശരി നൂറില് താഴെയായിരുന്നപ്പോഴായിരുന്നു ഇളവുകള്. എന്നാല്, ഇപ്പോള് പ്രതിദിന കേസുകള് മുവ്വായിരം കടന്നിരിക്കുകയാണ്.