ചെന്നൈ: തെരഞ്ഞെടുപ്പില് പങ്കെടുക്കുന്ന കാര്യത്തില് ഉടന് തീരുമാനം പ്രഖ്യാപിക്കുമെന്ന് നടന് രജനീകാന്ത്. മക്കള് മന്ഡ്രം ജില്ലാ ഭാരവാഹികളുമായുമായുളള യോഗത്തിന് ശേഷമാണ് അദ്ദേഹം ഇക്കാര്യം അറിയിച്ചത്. അദ്ദേഹത്തിന്റെ തന്നെ ഉടമസ്ഥതയിലുളള കോടമ്പാക്കം രാഘവേന്ദ്ര കല്യാണ മണ്ഡപത്തില് വെച്ചായിരുന്നു സുപ്രധാനമായ യോഗം നടന്നത്.
‘ജില്ലാ ഭാരവാഹികള് അവരുടെ അഭിപ്രായങ്ങള് പങ്കുവച്ചു. ഞാനെടുക്കുന്ന എന്ത് തീരുമാനത്തോടും അവര് യോജിക്കുമെന്നാണ് അവര് പറഞ്ഞത്. ഞാനെന്റെ തീരുമാനം എത്രയും പെട്ടെന്ന് അറിയിക്കും.’-ചെന്നൈയിലെ വസതിയില് വെച്ച് മാധ്യമങ്ങളോട് സംസാരിക്കവെ അദ്ദേഹം പറഞ്ഞു.
2017 ഡിസംബറിലാണ് താന് ഒരു രാഷ്ട്രീയ പാര്ട്ടി രൂപീകരിക്കുമെന്നും നിയമസഭാ തെരഞ്ഞെടുപ്പില് മത്സരിക്കുമെന്നും രജനീകാന്ത് പ്രഖ്യാപിച്ചത്. എന്നാല് പിന്നീട് അസുഖങ്ങളെ തുടര്ന്ന് തീരുമാനത്തില് നിന്ന് പിന്മാറുന്നു എന്ന തരത്തില് വാര്ത്തകള് പരന്നിരുന്നു.
കഴിഞ്ഞ മാര്ച്ചില് വരുന്ന നിയമസഭാ തെരഞ്ഞെടുപ്പില് മുഖ്യമന്ത്രി സ്ഥാനാര്ഥിയാവാന് താനില്ലെന്നും എന്നാല് ഉടന് രൂപീകരിക്കുന്ന രാഷ്ട്രീയ പാര്ട്ടിയുടെ അധ്യക്ഷന് ആവുമെന്നും രജനി പറഞ്ഞിരുന്നു. അതേസമയം കഴിഞ്ഞയാഴ്ച ചെന്നൈയില് എത്തിയ അമിത് ഷായും രജനീകാന്തുമായും കൂടിക്കാഴ്ച നടത്തിയിരുന്നു.
