തിരുവനന്തപുരം: ജനുവരിയില്‍ അവസാനിക്കുന്ന പി.എസ്.സി. റാങ്ക് ലിസ്റ്റുകളുടെ കാലാവധി ആറ് മാസത്തേക്ക് കൂടി നീട്ടും. ഇന്ന് ചേര്‍ന്ന മന്ത്രിസഭാ യോഗത്തിലാണ് തീരുമാനം. റാങ്ക് പട്ടികകളുടെ കാലാവധി നീട്ടണമെന്ന് ആവശ്യപ്പെട്ട് റാങ്ക് ഹോള്‍ഡേഴ്സ് സമരം തുടരുന്നതിനിടെയാണ് സര്‍ക്കാരിന്റെ നിര്‍ണായക തീരുമാനം. അതേസമയം മാര്‍ച്ച്, ഏപ്രില്‍ മാസങ്ങളില്‍ അവസാനിക്കുന്ന റാങ്ക് പട്ടികയുടെ കാര്യത്തില്‍ തീരുമാനമായില്ല.
സി-ഡിറ്റിലെ 115 താല്‍കാലിക കരാര്‍ ജീവനക്കാരെ സ്ഥിരപ്പെടുത്താനും മന്ത്രിസഭാ യോഗത്തില്‍ തീരുമാനമായി. പത്ത് വര്‍ഷം പൂര്‍ത്തിയായെന്ന മാനദ്ണ്ഡം മാത്രം പരിഗണിച്ചാണ് തീരുമാനം. പെന്‍ഷന്‍ പ്രായം ഉയര്‍ത്തില്ലെന്ന് ധനമന്ത്രി തോമസ് ഐസക്ക് അറിയിച്ചു. ക്രൈസ്തവ നാടാര്‍ വിഭാഗത്തെ പൂര്‍ണമായി പിന്നാക്ക സമുദായ വിഭാഗത്തില്‍ (ഒ.ബി.സി) ഉള്‍പ്പെടുത്തും. നേരത്തെ, ഹിന്ദു നാടാര്‍, എസ്.ഐ.യു.സി വിഭാഗങ്ങള്‍ക്ക് മാത്രമാണ് സംവരണം ലഭിച്ചിരുന്നത്. സംവരണം വന്നതോടെ വിവിധ ക്രൈസ്തവ വിഭാഗങ്ങളിലും മതവിഭാഗങ്ങളിലും ഉള്‍പ്പെടുന്ന മുഴുവന്‍ നാടാര്‍ വിഭാഗക്കാര്‍ക്കും സംവരണം ലഭിക്കും.
