തിരുവനന്തപുരം: നിയമസഭാ തെരഞ്ഞെടുപ്പില് പാര്ട്ടി നിര്ബന്ധിച്ചാല് മത്സരിക്കുമെന്ന് ബിജെപി സംസ്ഥാന അധ്യക്ഷന് കെ.സുരേന്ദ്രന്. മത്സരിക്കണോ വേണ്ടയോ എന്ന കാര്യം പാര്ട്ടി തീരുമാനിച്ചിട്ടില്ല. മത്സരിക്കാതെ പ്രചാരണം നടത്തണമെന്ന് പാര്ട്ടി പറഞ്ഞാല് അതായിരിക്കും ഏറ്റവും സന്തോഷമുള്ള കാര്യം. മത്സരിച്ചേ മതിയാകൂ എന്ന് പാര്ട്ടി പറഞ്ഞാല് മത്സരിക്കേണ്ടിവരുമെന്നും സുരേന്ദ്രന് പറഞ്ഞു.
തെരഞ്ഞെടുപ്പില് മുതിര്ന്ന നേതാക്കളെല്ലാം മത്സരിക്കണമെന്നാണ് പാര്ട്ടി ആഗ്രഹിക്കുന്നത്. തെരഞ്ഞെടുപ്പ് തയ്യാറെടുപ്പുകള്, പ്രചരണം എന്നിവക്കായി കുറച്ചുപേര് മാറി നില്ക്കണം. പാര്ട്ടി ഐക്യത്തോടെയാണ് തെരഞ്ഞെടുപ്പിനെ നേരിടുന്നതെന്ന് ശേഭാ സുരേന്ദ്രന് വിഷയത്തിന് മറുപടിയായി പറഞ്ഞ സുരേന്ദ്രന്, എല്ലാവരും സജീവമാകുമെന്നും ആരും മാറിനില്ക്കില്ലെന്നും കൂട്ടിച്ചേര്ത്തു.
കുമ്മനം രാജശേഖരന് ഉള്പ്പെടെയുള്ള നേതാക്കളുടെ പേരുകള് പല മണ്ഡലങ്ങളില് പരിഗണിക്കുന്നുണ്ട്. ഒ.രാജഗോപാല് മത്സരിക്കുന്ന കാര്യം പാര്ട്ടി കേന്ദ്രനേതൃത്വം തീരുമാനിക്കും. നേമത്തിന്റെ പേര് കേട്ടപ്പോഴേ ഉമ്മന്ചാണ്ടി ഓടി. തിരുവനന്തപുരം മണ്ഡലം വിട്ട് നേമത്തേക്കില്ലെന്ന് ശിവകുമാറും പറഞ്ഞു. നേമം എന്ന് കേട്ടാല് ആരും വരില്ലെന്നും സുരേന്ദ്രന് പറഞ്ഞു.
