ലോക്ഡൗണ് കാലത്തെ പരിമിതികള്ക്കിടയില് വീട്ടിലിരിക്കുന്ന പ്രേക്ഷകരെ രസിപ്പിക്കാനും അവരുടെ സാന്നിധ്യം ഉറപ്പിക്കാനും ശ്രമിച്ച മാധ്യമ-വിനോദ വ്യവസായത്തെ പ്രശംസിച്ച് മീഡിയ ആന്ഡ് എന്റര്ടെയ്ന്മെന്റ് സിഐഐ നാഷണല് കമ്മിറ്റി ചെയര്മാനും സ്റ്റാര് ആന്ഡ് ഡിസ്നി ഇന്ത്യയുടെ മാനേജിങ് ഡയറക്ടറുമായ കെ മാധവന്. സിഐഐ ബിഗ് പിക്ചര് സമ്മിറ്റില് വീഡിയോ കോണ്ഫറന്സിലൂടെ സംസാരിക്കുകയായിരുന്നു അദ്ദേഹം.
നമ്മളില് മിക്കവരെയും സാമ്പത്തികമായി തളര്ത്തിയ വര്ഷമാണ് 2020. ഈ മേഖലയില് മുന്പ് ഒരിക്കലും ഇത്രത്തോളം തടസ്സമുണ്ടാകുമെന്ന് പ്രതീക്ഷിച്ചിരുന്നില്ല. കണ്ടന്റ് പ്രൊഡക്ഷന് നിര്ത്തി, തത്സമയ കായിക ഇനങ്ങളും പരിപാടികളും റദ്ദാക്കി, സിനിമാ ഹാളുകളും തിയേറ്ററുകളും അടച്ചു.ലോകമെമ്പാടുമുള്ള സേവനങ്ങളുടെ ആവശ്യകത കുറയുകയും പരസ്യ ചെലവുകളില് വലിയ വെട്ടിക്കുറവ് ഉണ്ടാകുകയും ചെയ്തതോടെ വിനോദ മേഖലയ്ക്ക് ഒരു നീണ്ട വിരാമം എടുക്കേണ്ട അവസ്ഥയായി. എന്നിരുന്നാലും പരിമിതികളില് നിന്നുകൊണ്ട് മുഴുവന് മാധ്യമ, വിനോദ വ്യവസായങ്ങളും ഒത്തുചേര്ന്ന് ദശലക്ഷക്കണക്കിന് കാഴ്ചക്കാരെ സ്വന്തമാക്കുകയും അവരുമായി ഇടപഴകുകയും സന്തോഷിപ്പിക്കുകയും ചെയ്തു.
ലോക്ക്ഡൗണ് സമയത്ത് ടെലിവിഷന്, ഗെയിമിംഗ്, ഡിജിറ്റല് സ്ട്രീമിംഗ് പ്ലാറ്റ്ഫോമുകള് പോലുള്ള മാധ്യമങ്ങളെ ജനങ്ങള് കൂടുതല് ആശ്രയിച്ചു. പ്രീ-ലോക്ക്ഡൗണ് സമയത്തേക്കാള് 37% ശതമാനം വളര്ച്ചയുണ്ടായി. ഐപിഎല് 2020 മത്സരത്തിലൂടെ ലൈവ് സ്പോര്ട്സ് മികച്ച തിരിച്ചുവരവാണ് നടത്തിയത്. പകര്ച്ചവ്യാധിയുടെ സമയത്ത് നടന്ന ഏറ്റവും വലിയ തത്സമയ ക്രിക്കറ്റ് ടൂര്ണമെന്റ് മാത്രമായിരുന്നില്ല ഐപിഎല്, രാജ്യത്തിന് പ്രതീക്ഷയുടെ ദീപം കൂടിയായിരുന്നു. കഴിഞ്ഞ വര്ഷത്തേക്കാള് 23% കൂടുതല് വ്യൂവേഴ്സിനെ സ്വന്തമാക്കി മുന്വര്ഷത്തെ എല്ലാ റെക്കോര്ഡുകള് ഈ ടൂര്ണമെന്റ് തകര്ത്തു. പ്രേക്ഷകരില് നിന്നും പരസ്യദാതാക്കളില് നിന്നുമുള്ള പ്രതികരണം വിനോദമേഖലയ്ക്ക് ഉണര്വേകി. മാധ്യമലോകത്തിന്റെ തിരിച്ചുവരവ് എന്ന നിലയ്ക്ക് ഐപിഎല് മാറുകയായിരുന്നു.
ചലച്ചിത്ര വ്യവസായം ഡിജിറ്റല് ഫ്ളാറ്റ്ഫോമുകള്ക്ക് ആനുയോജ്യമായ തരത്തില് മാറി. സിനിമകളെ ഡിജിറ്റല് മോഡലില് നിര്മ്മിച്ച് പ്രദര്ശിപ്പിച്ചു തുടങ്ങി. തിയേറ്ററുകള് തുറക്കുന്നതില് ഇനിയും കാലതാമസം ഉണ്ടാകും. പക്ഷേ ആരാധകര് തങ്ങളുടെ പ്രിയപ്പെട്ട സിനിമകള് സുരക്ഷിതത്തോടെ തിയേറ്ററിലിരുന്ന് കാണുമെന്നതില് എനിക്ക് ഉറപ്പുണ്ട്.
2030 ഓടെ മീഡിയ എന്റര്ടെയ്ന്മെന്റ് മേഖലയ്ക്ക് 24 ബില്ല്യണ് ഡോളറില് നിന്ന് 100 ബില്ല്യണ് ആയി വളരാനുള്ള കഴിവുണ്ട്. അതാണ് നമ്മുടെ ലക്ഷ്യം. 300 മില്ല്യണ് കുടുംബങ്ങളില് 120 മില്ല്യണ് കുടുംബങ്ങള് ടിവിയെ ആശ്രയിക്കുന്നുണ്ട്. 950 ദശലക്ഷത്തിലധികം മൊബൈല് വരിക്കാരുള്ള ഒരു രാജ്യത്ത് ഞങ്ങള്ക്ക് 500 ദശലക്ഷം സ്മാര്ട്ട്ഫോണുകള് മാത്രമേ ഉള്ളൂ.
ഈ മഹാമാരി കാലം, ഇ-കൊമേഴ്സ്, ഓണ്ലൈന് വീഡിയോ, ഡിജിറ്റല് ഗെയിമിംഗ് എന്നിങ്ങനെ ഉപഭോക്താക്കളെ മുമ്പൊരിക്കലുമില്ലാത്ത വിധം സാങ്കേതികവിദ്യ സ്വീകരിക്കാന് പ്രേരിപ്പിച്ചു- ഇത് ഈ മേഖലയെ പുതിയ ഉയരങ്ങളിലേക്ക് നയിക്കും.
ലക്ഷ്യം കൈവരിക്കാന് നിയന്ത്രങ്ങളില് ഇളവും വളരെ ലളിതമായ ഭരണ ഘടനയും ആവശ്യമാണ്. വ്യവസായത്തിന്റെ ആവശ്യങ്ങള്ക്കനുസരിച്ച് നയങ്ങള് രൂപപ്പെടുത്തിയാല് ഈ മേഖലയില് ഇന്ത്യ ആഗോളതലത്തില് മുന്നിലായിരിക്കും. വ്യവസായത്തിന്റെ ആവശ്യങ്ങള് പരിശോധിച്ച് അതിന്റെ വളര്ച്ച സുഗമമാക്കാന് ഉന്നതരോട് ഞാന് അഭ്യര്ത്ഥിക്കുകയാണ്.
