കൊച്ചി: സംസ്ഥാനത്ത് സ്വര്‍ണ വില സര്‍വകാല റെക്കോര്‍ഡ് നിരക്കിലേക്ക്. പവന് 480 രൂപയുടെ വര്‍ധനവാണ് രേഖപ്പെടുത്തിയിരിക്കുന്നത്. ഒരു പവന് സ്വര്‍ണത്തിന് 38,600 രൂപയാണ് വിപണി നിരക്ക്. ഗ്രാമിന് 60 രൂപ കൂടി 4,825 രൂപയാണ്. കഴിഞ്ഞ രണ്ട് ദിവസങ്ങളില്‍ സ്വര്‍ണവിലയില്‍ മാറ്റമില്ലാതെ തുടരുകയായിരുന്നു. 38120 രൂപയ്ക്കായിരുന്നു വ്യാപാരം നടന്നത്. എക്കാലത്തെയും ഏറ്റവും ഉയര്‍ന്ന നിരക്കാണ് ഇന്ന് രേഖപ്പെടുത്തിയിരിക്കുന്നത്.
ഈ വര്‍ഷം വിലയില്‍ ഏറ്റവും കുറഞ്ഞ നിരക്ക് രേഖപ്പെടുത്തിയത് ജനുവരി ഒന്നിനായിരുന്നു. അതിനുശേഷം സ്വര്‍ണ വിലയില്‍ റോക്കോര്‍ഡ് മുന്നേറ്റമാണ് നടന്നത്. ഇതില്‍ ഇടയ്ക്ക് ചില ദിവസങ്ങളില്‍ മാത്രമേ നേരിയ കുറവ് രേഖപ്പെടുത്തിയിരുന്നുളളു. ആഗോള വിപണികളില്‍ സ്വര്‍ണ വില എട്ട് വര്‍ഷത്തെ ഏറ്റവും ഉയര്‍ന്ന നിരക്കിലാണ് ഇപ്പോള്‍ എത്തി നില്‍ക്കുന്നത്. കോവിഡ് പ്രതിസന്ധി തുടരുന്നതും രൂപയുടെ മൂല്യം കുറഞ്ഞതുമാണ് വില വര്‍ധനവിന്റെ പ്രധാന കാരണം. എണ്ണ വില ഇടിയുന്നതിനാല്‍ സുരക്ഷിത നിക്ഷേപമെന്ന നിലയില്‍ സ്വര്‍ണ വില ഉയര്‍ന്നു കൊണ്ടിരിക്കുകയാണ്.
