ന്യൂഡല്ഹി: കര്ഷക നിയമത്തിനെതിരെ ഡല്ഹിയിലേക്ക് മാര്ച്ച് നടത്തുന്ന ആയിരക്കണക്കിന് കര്ഷകര് ഇന്ന് തലസ്ഥാന നഗരിയിലേക്കുള്ള യാത്ര പുനരാരംഭിക്കും. ഡല്ഹിയിലെക്കുള്ള വഴികള് പോലീസ് കോണ്ക്രീറ്റ് സ്ലാബുകളും മുള്ളുവേലിയും കൊണ്ട് അടച്ചിരിക്കുകയാണ്. എന്നാല് ഒരിഞ്ചുപോലും പുറകോട്ടില്ലെന്ന ഉറച്ച തീരുമാനത്തിലാണ് കര്ഷകര്.
ഹരിയാനയില് നിന്നുള്ള കര്ഷകര് ഇന്നലെ രാത്രി പാനിപ്പത്തിലാണ് തമ്പടിച്ചത്. അതിര്ത്തിയില് വൈകുന്നേരത്തോടെ 50,000ത്തിലധികം കര്ഷകര് എത്തിച്ചേരുമെന്നാണ് പ്രതീക്ഷയെന്ന് സയുക്ത കിസാന് മോര്ച്ചയുടെയും ഓള് ഇന്ത്യ കിസാന് സംഘര്ഷ് കോര്ഡിനേഷന് കമ്മിറ്റിയുടെയും പ്രസ്താവനയില് കഴിഞ്ഞ ദിവസം വ്യക്തമാക്കിയിരുന്നു.
കര്ഷക വിരുദ്ധ നിയമങ്ങള് പിന്വലിക്കാന് കേന്ദ്രം തയ്യാറാകാതെ സമരത്തില് നിന്ന് പിന്മാറില്ലെന്ന ഉറച്ച തീരുമാനത്തിലാണ് കര്ഷകര്. ട്രാക്ടറുകളിലും ട്രോളികളിലും ഉള്പ്രദേശങ്ങളിലുള്ള കര്ഷക സ്ത്രീകളെയും കുട്ടികളെയും കൂടി അതിര്ത്തിയില് എത്തിക്കുന്നതോടെ കര്ഷകരുടെ എണ്ണത്തില് വലിയ വര്ധനവുണ്ടാകും.
അതേസമയം കര്ഷകരുടെ നീക്കങ്ങളെ നേരിടാനായി കനത്ത പോലീസ് സന്നാഹമാണ് ഒരുക്കിയിരിക്കുന്നത്. ഉത്തര്പ്രേദശ്-ഡല്ഹി, ഹരിയാന-ഡല്ഹി അതിര്ത്തികളിലെല്ലാം പോലീസിനെ വിന്യസിച്ചിട്ടുണ്ട്. അതിര്ത്തികള് കോണ്ക്രീറ്റ് സ്ലാബുകള് കൊണ്ടും ബാരിക്കേടുകള് കൊണ്ടും അടച്ചിരിക്കുകയാണ്.
