Web Desk
കോവിഡ് പോരാട്ടത്തില് ഇന്ത്യ മെച്ചപ്പെട്ട നിലയിലെന്ന് പ്രധാനമന്ത്രി. കൃത്യസമയത്ത് ലോക്ഡൗണ് പ്രഖ്യാപിച്ചതും ശക്തമായ മുന്കരുതല് എടുത്തതും കരുത്തായി. ഇന്ത്യയിലെ കോവിഡ് മരണനിരക്ക് ഉയരുന്നില്ല എന്നത് ആശ്വാസകരമാണ്. കുറച്ചുപേരുടെ ഭാഗത്ത് നിന്നുള്ള ഉത്തരവാദിത്തക്കുറവ് ആശങ്ക സൃഷ്ടിക്കുന്നു. ലോക്ഡൗണ് ഇളവ് ചെയ്ത ശേഷം കോവിഡ് പ്രതിരോധത്തില് അലംഭാവം കൂടുന്നുവെന്നും പ്രധാനമന്ത്രി പറഞ്ഞു.
ജാഗ്രതയോടെ മുന്നോട്ട് പോകണം. മുന്കരുതല് ഏറ്റവും പ്രധാനപ്പെട്ട കാര്യമാണ്. മാസ്ക് നിര്ബന്ധമായും ധരിക്കണം. സര്ക്കാരിന്റെ നിര്ദേശങ്ങള് നിര്ബന്ധമായും പാലിക്കണം. ചട്ടലംഘനം അംഗീകരിക്കാനാകില്ല. ആരും നിയമത്തിന് അതീതരല്ലെന്നും പ്രധാനമന്ത്രി പറഞ്ഞു. രാജ്യത്തെ ഒറ്റ പൗരന് പോലും പട്ടിണി കിടക്കുന്നില്ലെന്ന് ഉറപ്പുവരുത്തണം. പാവപ്പെട്ടവര്ക്ക് ആവശ്യമായ സഹായങ്ങള് സര്ക്കാര് സമയോചിതമായി നല്കുന്നുണ്ട്. പ്രധാനമന്ത്രി ഗരീബ് കല്യാണ് അന്നയോജന പദ്ധതി നവംബര് അവസാനം വരെ നീട്ടിയതായും പ്രധാനമന്ത്രി പറഞ്ഞു.
80 കോടി കുടുംബങ്ങള്ക്ക് പ്രതിമാസം അഞ്ച് കിലോ അരിയോ ഗോതമ്പോ ലഭിക്കും. ഉത്സവാഘോഷങ്ങള് തുടങ്ങുന്നത് കണക്കിലെടുത്താണ് തീരുമാനം. ഓരോ കുടുംബത്തിനും പ്രതിമാസം ഒരു കിലോ കടലയും സൗജന്യമായി ലഭിക്കും. ദീപാവലി വരെ പദ്ധതിക്ക് ചെലവ് ഒന്നരലക്ഷം കോടി രൂപയാണെന്നും പ്രധാനമന്ത്രി പറഞ്ഞു.
കോവിഡ് മുന്കരുതലുകള് ലംഘിക്കുന്നവരെ നിരുത്സാഹപ്പെടുത്തണം. പ്രധാനമന്ത്രി മുതല് പഞ്ചായത്ത് പ്രസിഡന്റ് വരെ ആരും നിയമത്തിന് മുകളിലല്ല. മറ്റ് രോഗങ്ങള്ക്കെതിരെ മുന്കരുതല് വേണം. പനിയും ചുമയും ഉള്പ്പെടെ മറ്റ് രോഗങ്ങള് വ്യാപിക്കുന്ന സമയമാണ്. ഓരോ പൗരനും ആരോഗ്യകാര്യത്തില് പ്രത്യേക കരുതലെടുക്കണമെന്നും പ്രധാനമന്ത്രി പറഞ്ഞു.
