വാഷിങ്ടണ് ഡിസി: മ്യാന്മറിലെ സൈന്യ തലവന്മാര്ക്കുമേല് ഉപരോധം ഏര്പ്പെടുത്തി അമേരിക്ക. പട്ടാള അട്ടിമറിക്ക് പിന്നാലെയാണ് മ്യാന്മര് സൈന്യത്തലവന്മാര്ക്ക് മേല് ഉപരോധം ഏര്പ്പെടുത്തിയ എക്സിക്യൂട്ടീവ് ഉത്തരവില് അമേരിക്കന് പ്രസിഡന്റ് ജോ ബൈഡന് ഒപ്പുവെച്ചത്.
അമേരിക്ക മ്യാന്മറിന് സഹായമായി നല്കിയ ഒരു ബില്ല്യണ് യുഎസ് ഡോളര് സൈന്യം ഉപയോഗിക്കുന്നില്ലെന്ന് ഉറപ്പുവരുത്താനുളള നടപടികളും ബൈഡന് സ്വീകരിച്ചു. മ്യാന്മറില് പട്ടാള അട്ടിമറിക്കെതിരെ പതിനായിരക്കണക്കിനാളുകളാണ് തെരുവില് പ്രതിഷേധിക്കുന്നത്. പട്ടാളത്തിനുമേല് അധികാരമൊഴിയാന് അന്താരാഷ്ട്ര സമ്മര്ദ്ദം കൂടുമ്പോഴും തെരഞ്ഞെടുപ്പ് നടത്തി അധികാര കൈമാറ്റം ഉറപ്പുവരുത്തുമെന്നാണ് സൈന്യതലവന് മിന് ഓങ് ഹ്ളെയിങ്ങ് പറയുന്നത്.
ഫെബ്രുവരി ഒന്നിനാണ് തെരഞ്ഞെടുപ്പില് ക്രമക്കേട് ആരോപിച്ച് മ്യാന്മര് സൈന്യം അധികാരം പിടിച്ചെടുക്കുന്നത്. ആങ് സാങ് സൂചിയേയും നിരവധി പ്രവിശ്യാ മുഖ്യമന്ത്രിമാരെയും തടവിലാക്കിയതിന് പിന്നാലെപട്ടാളം അധികാരം പിടിച്ചെടുക്കുകയായിരുന്നു. പ്രതിഷേധങ്ങളെ അടിച്ചമര്ത്തുന്നതിന്റെ ഭാഗമായി സൈന്യം ഒരു വര്ഷത്തേക്ക് അടിയന്തരാവസ്ഥയും പ്രഖ്യാപിച്ചിരുന്നു.
