ന്യൂഡല്ഹി: കേരളത്തില് കോവിഡ് വാക്സിന്റെ കുത്തിവെപ്പ് കുറയുന്നതില് കേന്ദ്രസര്ക്കാരിന് അതൃപ്തി. കേരളമുള്പ്പെടെ നാല് സംസ്ഥാനങ്ങളിലാണ് വാക്സിന് കുത്തിവെപ്പില് വലിയ തോതില് കുറവ് രേഖപ്പെടുത്തിയതെന്ന് കേന്ദ്രത്തിന്റെ കണക്ക് സൂചിപ്പിക്കുന്നു. 25 ശതമാനത്തില് താഴെയാണ് കേരളത്തില് വാക്സില് കുത്തിവെപ്പ് എടുത്തവരുടെ എണ്ണം.
അതേസമയം വാക്സിനിലുള്ള സംശയം മൂലമാണ് കുത്തിവെപ്പ് കുറയുന്നതെന്ന് കേരളം പ്രതികരിച്ചു. കേരളത്തിലും തമിഴ്നാട്ടിലുമാണ് വാക്സിന് കുത്തിവെപ്പില് വലിയ തോതില് കുറവ് രേഖപ്പെടുത്തിയത്. ഇവര്ക്ക് പുറമെ പഞ്ചാബും ചത്തീസ്ഗഡും കുറവ് കുത്തിവെപ്പെടുത്ത സംസ്ഥാനങ്ങളില് പെടുന്നു. വാക്സിനേഷന് ചുമതലയുള്ള ഉദ്യോഗസ്ഥരുമായുള്ള വീഡിയോ കോണ്ഫറന്സിലാണ് കേന്ദ്രം അതൃപ്തി രേഖപ്പെടുത്തിയത്. നാല് സംസ്ഥാനങ്ങളോടും വാക്സിനുമായി ബന്ധപ്പെട്ട് ജനങ്ങളില് വിശ്വാസ്യത ഉണ്ടാക്കണമെന്നും കേന്ദ്രം ആവശ്യപ്പെട്ടിട്ടുണ്ട്.
കഴിഞ്ഞ ശനിയാഴ്ച കണ്ടിരുന്ന വാക്സിന് കുത്തിവെപ്പ് മുന്നേറ്റം പലയിടത്തും ഇപ്പോള് കാണുന്നില്ല. ഡല്ഹി ഓള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സില് 50 പേരില് താഴെ മാത്രം പേരാണ് കഴിഞ്ഞ ദിവസം കുത്തിവെപ്പെടുത്തത്. കേന്ദ്രസര്ക്കാരിന്റെ പ്രതീക്ഷ പ്രകാരം ഒരു ദിവസം 100 പേര് കുത്തിവെപ്പ് സ്വീകരിക്കേണ്ടതുണ്ട്. മികച്ച രീതിയില് കുത്തിവെപ്പ് സ്വീകരിച്ച കര്ണാടക, തെലങ്കാന, ആന്ധ്രപ്രദേശ് തുടങ്ങിയ സംസ്ഥാനങ്ങളെയും റിവ്യൂ മീറ്റില് കേന്ദ്രം പരാമര്ശിച്ചു. 70 ശതമാനമാണ ്ഈ സംസ്ഥാനങ്ങളിലെ കുത്തിവെപ്പ്.
