ഡല്ഹി: കേന്ദ്ര സര്ക്കാരിന്റെ വിവാദ കാര്ഷിക നിയമം പിന്വലിക്കാതെ പിന്നോട്ടില്ലെന്ന നിലപാടില് പ്രതിഷേധിച്ച് കര്ഷകര് ഇന്ന് ഒമ്പത് മണിക്കൂര് നിരാഹാര സമരം അനുഷ്ഠിക്കും. കാര്ഷിക നിയമങ്ങള് പിന്വലിക്കാന് കഴിയില്ലെന്ന നിലപാടില് സര്ക്കാര് ഉറച്ചു നില്ക്കുന്നതോടെയാണ് കര്ഷകര് ഇന്നുമുതല് സമരം ശക്തമാക്കുന്നത്. രാവിലെ എട്ട് മണി മുതല് അതാത് ഇടങ്ങളില് കര്ഷകര് ഒമ്പത് മണിക്കൂര് നിരാഹാര സമരം അനുഷ്ഠിക്കും.
കര്ഷക സംഘടനകള് ആഹ്വാനം ചെയ്ത പ്രതിഷേധ ധര്ണ രാജ്യത്തെ എല്ലാ ജില്ല കേന്ദ്രങ്ങളിലും അരങ്ങേറും. കര്ഷകര്ക്ക് പിന്തുണ പ്രഖ്യാപിച്ച് ഡല്ഹി മുഖ്യമന്ത്രി അരവിന്ദ് കെജ്രിവാളും നിരാഹാര സമരം നടത്തും. കേന്ദ്ര സര്ക്കാരിനെതിരെയുളള കര്ഷക സമരം 19ാം ദിവസത്തിലേക്ക് കടന്നിരിക്കുകയാണ്. സമരത്തിന് ഐക്യദാര്ഢ്യവുമായി നിരാഹാര സമരത്തില് അണിചേരാന് പാര്ട്ടി പ്രവര്ത്തകരോടും പൊതുജനങ്ങളോടും കെജ്രിവാള് ആഹ്വാനം ചെയ്തിട്ടുണ്ട്.
സിംഗു, ഹരിയാന, ഗാസിപൂര്,രാജസ്ഥാന് അതിര്ത്തികളടക്കം ഉപരോധിച്ചു കൊണ്ടുളള സമരം തുടരുകയാണ്. രാജസ്ഥാനില് നിന്ന് ഡല്ഹിലേക്കുളള ദേശീയ പാതയും ഞായറാഴ്ച മുതല് കര്ഷകര് ഉപരോധിച്ചു തുടങ്ങിയിരുന്നു. ചര്ച്ചയ്ക്കുളള ക്ഷണം സര്ക്കാര് ആവര്ത്തിച്ചെങ്കിലും നിയമം പിന്വലിക്കുന്നത് ആദ്യ അജണ്ടയാക്കണമെന്ന് കര്ഷക സംഘടനകള് ആവശ്യപ്പെട്ടു. അതേസമയം പുതിയ നിയമങ്ങളെ പിന്തുണക്കുന്ന കര്ഷകരുടേതെന്ന പേരില് ബി.ജെ.പി കിസാന് ചൗപാല് സമ്മേളനവും ആരംഭിച്ചിട്ടുണ്ട്.
