ഡല്‍ഹി: കേന്ദ്രസര്‍ക്കാരിന്റെ കര്‍ഷക നയങ്ങള്‍ക്കെതിരെ പ്രതിഷേധിക്കുന്ന കര്‍ഷക സംഘടനകളുമായി കേന്ദ്ര സര്‍ക്കാര്‍ ഇന്ന് ചര്‍ച്ച ഇന്ന് നടത്തും. കര്‍ഷകരുടെ പ്രതിഷേധം എട്ടാം ദിവസത്തിലേക്ക് കടന്നിരിക്കുകയാണ്. കേന്ദ്രസര്‍ക്കാര്‍ പാസ്സാക്കിയ മൂന്ന് കാര്‍ഷിക നിയമങ്ങളും പിന്‍വലിക്കണമെന്ന ആവശ്യത്തില്‍ കര്‍ഷകര്‍ ഉറച്ചു നില്‍ക്കുകയാണ്.
രാവിലെ പതിനൊന്ന് മണിക്ക് വിഗ്യാന്‍ ഭവനില്‍ വെച്ചാണ് യോഗം നടക്കുക. ചര്‍ച്ചയില്‍ പ്രശ്‌ന പരിഹാരം ഉണ്ടായില്ലെങ്കില്‍ കര്‍ഷ സംഘടനകള്‍ സമരം കൂടുതല്‍ വ്യാപിപ്പിക്കാനാണ് സാധ്യത. ഡല്‍ഹി, ഹരിയാന അതിര്‍ത്തികളിലേക്ക് കൂടുതല്‍ കര്‍ഷകര്‍ വന്നു കൊണ്ടിരിക്കുകയാണ്. ഇന്ന് നടക്കുന്ന ചര്‍ച്ചയില്‍ കര്‍ഷകരെ അനുനയിപ്പിക്കാന്‍ സാധിക്കുമെന്ന വിശ്വാസത്തിലാണ് ബിജെപി സര്‍ക്കാര്‍.
ആദ്യഘട്ടത്തില്‍ കര്‍ഷകരുമായി കേന്ദ്ര ആഭ്യന്തര മന്ത്രി അമിത് ഷാ സംസാരിച്ചിരുന്നുവെങ്കിലും പരാജയപ്പെട്ടിരുന്നു. പിന്നീട് ചുമതല കേന്ദ്ര പ്രതിരോധ മന്ത്രി രാജ്‌നാഥ് സിംഗിന് കൈമാറുകയായിരുന്നു. ഇതിനു ശേഷമാണ് വീണ്ടും കര്‍ഷകരെ അനുനയിപ്പിക്കാന്‍ അമിത് ഷാ തന്നെ രംഗത്തെത്തുന്നത്.
