രാജ്യത്ത് കഴിഞ്ഞ 24 മണിക്കൂറില്‍ കോവിഡ് സ്ഥിരീകരിച്ചത് 62,064 പേര്‍ക്ക്. ഇന്നലെ മാത്രം 1,007 പേര്‍ മരിക്കുകയും ചെയ്തു. ഇതോടെ രാജ്യത്തെ രോഗബാധിതരുടെ എണ്ണം 22.15 ലക്ഷം പിന്നിട്ടു. ഇത് ആദ്യമായാണ് പ്രതിദിന രോഗബാധയിലും മരണത്തിലും ലോകത്ത് ഇന്ത്യ ഒന്നാമത് എത്തുന്നത്. ആയിരത്തിന് മുകളില്‍ മരണം രാജ്യത്ത് മരണം രേഖപ്പെടുത്തുന്നതും ആദ്യമായിട്ടാണ്. ഇതുവരെ 15.35 ലക്ഷം ആളുകളാണ് രോഗമുക്തി നേടിയത്. 44,386 പേരാണ് ഇതുവരെ മരിച്ചത്. നിലവില്‍ 6.34 ലക്ഷം പേര്‍ ചികിത്സയില്‍ കഴിയുന്നതായും കേന്ദ്ര ആരോഗ്യ മന്ത്രാലയം അറിയിച്ചു.
രാജ്യത്ത് മഹാരാഷ്ട്ര, ആന്ധ്രപ്രദേശ്, കര്‍ണാടക, തമിഴ്നാട് എന്നിവിടങ്ങളിലാണ് രോഗബാധിതര്‍ കൂടുതല്‍. മഹാരാഷ്ട്രയില്‍ ഇന്നലെ 12,248 പേര്‍ക്ക് കോവിഡ് സ്ഥിരീകരിച്ചു. ഇതോടെ ആകെ രോഗികളുടെ എണ്ണം 5.15 ലക്ഷമായി. 390 പേരാണ് ഇന്നലെ മാത്രം മരിച്ചത്. ഇതോടെ ആകെ മരണം 17,757 ആയി. 3.51 ലക്ഷം ജനങ്ങള്‍ രോഗമുക്തി നേടി, നിലവില്‍ 1.45 ലക്ഷം പേരാണ് ചികിത്സയിലുളളത്. ആന്ധ്രാപ്രദേശില്‍ ഇന്നലെ 10,820 പേര്‍ക്കാണ് രോഗം സ്ഥിരീകരിച്ചത്. 97 പേര്‍ മരിക്കുകയും ചെയ്തു. ആകെ രോഗികളുടെ എണ്ണം 2.27 ലക്ഷമായി. ഇതുവരെ 2,036 പേരാണ് മരിച്ചത്. 1.38 ലക്ഷം ആളുകള്‍ രോഗമുക്തി നേടി.
കര്‍ണാടകയില്‍ ഇന്നലെ 5,985 പേര്‍ക്കാണ് രോഗം സ്ഥിരീകരിച്ചത്. 107പേര്‍ മരിച്ചു. ആകെ രോഗികളുടെ എണ്ണം 1.78 ലക്ഷമാണ്. 80,973പേരാണ് നിലവില്‍ ചികിത്സയിലുള്ളത്. 93,908പേര്‍ രോഗമുക്തി നേടി. 3,198പേര്‍ മരിച്ചു. തമിഴ്‌നാട്ടില്‍ കോവിഡ് ബാധിതര്‍ മൂന്ന് ലക്ഷത്തിലേക്ക് അടുക്കുകയാണ്. ഇതുവരെ 2,96,901 പേര്‍ക്കാണ് കൊവിഡ് സ്ഥിരീകരിച്ചത്. 2,38,638 പേര്‍ രോഗമുക്തി നേടി ആശുപത്രി വിട്ടു. കേരളത്തില്‍ ഇന്നലെ1,211 പേര്‍ക്കാണ് കൊവിഡ് സ്ഥിരീകരിച്ചത്. നിലവില്‍ 12,347 പേരാണ് രോഗം ബാധിച്ച്‌ ചികിത്സയിലുളളത്. ഇതുവരെ 108 പേര്‍ മരിച്ചെന്നാണ് ഔദ്യോഗിക വിവരം. കൂടാതെ 21,836 പേര്‍ രോഗമുക്തി നേടി.
ലോകത്ത് ഞായറാഴ്ചത്തെ കോവിഡ് ബാധിതരുടെയും മരിച്ചവരുടെയും കണക്കില്‍ ഇന്ത്യയാണ് മുന്നില്‍. ലോകത്ത് കഴിഞ്ഞ 24 മണിക്കൂറില്‍ കൊവിഡ് സ്ഥിരീകരിച്ചത് 2.19 ലക്ഷം ആളുകള്‍ക്കാണ്. ഇന്നലെ മാത്രം 4,798 പേരാണ് മരിച്ചത്. ഇതോടെ 214 രാജ്യങ്ങളിലായി രോഗബാധിതരുടെ എണ്ണം രണ്ടുകോടി (20,016,534) കടന്നു. 1.28 കോടി ജനങ്ങള്‍ രോഗമുക്തി നേടി. നിലവില്‍ 63.90 ലക്ഷം പേര്‍ ചികിത്സയിലുണ്ട്. ഇതുവരെ 7.33 ലക്ഷം ജനങ്ങളാണ് കൊവിഡിനെ തുടര്‍ന്ന് മരിച്ചതെന്നും വേള്‍ഡോമീറ്റേഴ്‌സിന്റെ കണക്കുകള്‍ വ്യക്തമാക്കുന്നു.
അമേരിക്ക, ബ്രസീല്‍, ഇന്ത്യ എന്നി രാജ്യങ്ങളിലാണ് കൊവിഡ് രോഗബാധിതരും മരണനിരക്കും കൂടുതലുളളത്. അമേരിക്കയില്‍ 47,849, ബ്രസീലില്‍ 22,213 എന്നിങ്ങനെയാണ് കഴിഞ്ഞ 24 മണിക്കൂറിലെ രോഗബാധിതരുടെ എണ്ണം. ബ്രസീലില്‍ 593, അമേരിക്കയില്‍ 534, മെക്‌സിക്കോയില്‍ 695, കൊളംബിയയില്‍ 302, പെറുവില്‍ 228 എന്നിങ്ങനെയാണ് വിവിധ രാജ്യങ്ങളിലെ ഇന്നലത്തെ മരണനിരക്ക്.
