Web Desk
ശ്രീനാരായണ ഗുരു തീര്‍ത്ഥാടന സര്‍ക്യൂട്ട് പദ്ധതി പുനരുജ്ജീവിപ്പിക്കുമെന്ന് കേന്ദ്ര ടൂറിസം മന്ത്രാലയം സംസ്ഥാന സര്‍ക്കാരിനെ അറിയിച്ചു. പദ്ധതി ഉപേക്ഷിക്കാനുള്ള തീരുമാനം പിന്‍വലിക്കണമെന്ന് ആവശ്യപ്പെട്ട് മന്ത്രി കടകംപള്ളി സുരേന്ദ്രന്‍ കേന്ദ്ര ടൂറിസം മന്ത്രാലയത്തിന് കത്ത് നല്‍കിയതിനെ തുടര്‍ന്നാണ് കേന്ദ്രത്തിന്‍റെ തീരുമാനം.
69.47 കോടി രൂപയുടെ ശ്രീനാരായണ ഗുരു തീര്‍ത്ഥാടന സര്‍ക്യൂട്ട് പദ്ധതി പ്രത്യേകിച്ച് കാരണമൊന്നും വ്യക്തമാക്കാതെ റദ്ദാക്കിയ കേന്ദ്രസര്‍ക്കാര്‍ നടപടിക്കെതിരെ ശക്തമായ പ്രതിഷേധം സംസ്ഥാനത്ത് ഉയര്‍ന്നിരുന്നു. പദ്ധതി പുനരുജ്ജീവിപ്പിക്കാനുള്ള കേന്ദ്ര തീരുമാനം സ്വാഗതാര്‍ഹമാണെന്ന് മന്ത്രി കടകംപള്ളി സുരേന്ദ്രന്‍ പ്രതികരിച്ചു. പദ്ധതി നടത്തിപ്പ് നടപടി ക്രമം പാലിച്ച് സംസ്ഥാന ടൂറിസം വകുപ്പിനെ ഏല്‍പ്പിക്കണമെന്നും മന്ത്രി ആവശ്യപ്പെട്ടു.
കേന്ദ്ര സ്ഥാപനമായ ഐടിഡിസിയെയാണ് പദ്ധതി നേരത്തെ ഏല്‍പ്പിച്ചിരുന്നത്. 133 ആരാധാനാലയങ്ങളുടെ അടിസ്ഥാന സൗകര്യ വികസിപ്പിക്കുന്നതിനുള്ള 85.22 കോടി രൂപയുടെ സ്പിരിച്ചല്‍ ടൂറിസം പദ്ധതി കൂടി പുനരുജ്ജീവിപ്പിക്കണമെന്നും മന്ത്രി കടകംപള്ളി സുരേന്ദ്രന്‍ കേന്ദ്രത്തോട് ആവശ്യപ്പെട്ടു.
