കുവൈത്ത് സിറ്റി : ലാഭകരമല്ലാതായതോടെ കുവൈത്തിലേക്ക് നിരവധി രാജ്യാന്തര വിമാനങ്ങൾ സർവീസ് നിർത്തി. അറുപത് വർഷത്തിലേറെക്കാലം കുവൈത്തിലേക്ക് സർവീസ് നടത്തിയിരുന്ന ബ്രിട്ടിഷ് എയർവേയ്സ് കഴിഞ്ഞ മാർച്ചിൽ കുവൈത്തിലേക്കുള്ള പ്രതിദിന സർവീസ് നിർത്തിവച്ചു. സെപ്റ്റംബറില് ജര്മനിയുടെ ലുഫ്താന്സയും നെതര്ലൻഡസിന്റെ കെ.എല്.എമ്മും സര്വീസുകള് നിര്ത്തി. ഇത്തരത്തിൽ പതിനാലു രാജ്യാന്തര വിമാന കമ്പനികളാണ് സമീപ കാലത്ത് കുവൈത്ത് ഇന്റര്നാഷനല് എയര്പോര്ട്ടിലേക്കുള്ള സർവീസ് അവസാനിപ്പിച്ചത്. അതേസമയം, യാത്രക്കാരുടെ കുറവ് മാത്രമല്ല മറ്റു കാരണങ്ങളും സർവീസ് അവസാനിപ്പിക്കാൻ കാരണമാകുന്നുണ്ട്. ഉയര്ന്ന ഇന്ധന വില, പ്രാദേശിക വിമാന കമ്പനികളില് നിന്നുള്ള മത്സരം, അടിസ്ഥാന സൗകര്യങ്ങളിലും പാസഞ്ചര് സേവനങ്ങളിലും നിലനില്ക്കുന്ന പോരായ്മകള് എന്നീ കാരണങ്ങളും സർവീസ് നിർത്താൻ കാരണമായിട്ടുണ്ട്.
കുവൈത്ത് രാജ്യാന്തര വിമാനത്താവളത്തില് കഴിഞ്ഞ വര്ഷം യാത്രക്കാരുടെ എണ്ണത്തില് ഒരു ശതമാനം ഇടിവ് രേഖപ്പെടുത്തി. 2024 ല് 1.54 കോടി യാത്രക്കാരാണ് കുവൈത്ത് എയര്പോര്ട്ടിലൂടെ കടന്നുപോയത്. 2023 ല് യാത്രക്കാര് 1.56 കോടിയായിരുന്നു. അതേസമയം, ദുബായ് രാജ്യാന്തര വിമാനത്താവളത്തില് യാത്രക്കാരുടെ എണ്ണം 5.7 ശതമാനം വര്ധിച്ച് 9.23 കോടിയായി. ദോഹ എയര്പോര്ട്ടില് യാത്രക്കാരുടെ എണ്ണം 14.8 ശതമാനം കൂടി 5.27 കോടിയായി.
റിയാദ് എയര്പോര്ട്ടില് യാത്രക്കാരുടെ എണ്ണത്തില് 17.8 ശതമാനം വളര്ച്ച രേഖപ്പെടുത്തി. 2024 ല് 3.76 കോടി യാത്രക്കാര് റിയാദ് എയര്പോര്ട്ട് ഉപയോഗപ്പെടുത്തി. അബുദാബി വിമാനത്താവളത്തില് യാത്രക്കാരുടെ എണ്ണം 25.3 ശതമാനം വര്ധിച്ച് 2.87 കോടിയായി. അതേസമയം, കുവൈത്ത് വിമാനത്താവളത്തിൽ മാത്രമാണ് യാത്രക്കാരുടെ എണ്ണത്തിൽ ഇടിവ് രേഖപ്പെടുത്തിയത്.
