ദുബായ് : ദുബായ് റൈഡ് നടക്കുന്നത് കാരണം നഗരത്തിലെ ചില പ്രധാന റോഡുകളിൽ നാളെ മുതൽ കുറച്ചുസമയത്തേയ്ക്ക് വാഹനങ്ങൾക്ക് പ്രവേശനമുണ്ടായിരിക്കില്ലെന്ന് ദുബായ് റോഡ്സ് ആൻഡ് ട്രാൻസ്പോർട് അതോറിറ്റി(ആർടിഎ) അറിയിച്ചു.ട്രേഡ് സെന്റർ റൗണ്ട് എബൗട്ടിനും രണ്ടാമത്തെ പാലത്തിനും ഇടയിലുള്ള ഷെയ്ഖ് സായിദ് റോഡിന്റെ ഒരു ഭാഗം, ഷെയ്ഖ് സായിദ് റോഡിനും അൽ ഖൈൽ റോഡിനും ഇടയിലുള്ള ലോവർ ഫിനാൻഷ്യൽ സെന്റർ റോഡും ഷെയ്ഖ് മുഹമ്മദ് ബിൻ റാഷിദ് ബൊള് വാഡിൽ നിന്നുള്ള വൺവേയും പുലർച്ചെ 3.30 മുതൽ രാവിലെ 10 വരെ അടച്ചിടും. പകരം അൽ മുസ്താഖ്ബാൽ റോഡ്, അൽ വാസൽ റോഡ്, അൽ ഖൈൽ റോഡ് തുടങ്ങിയവയിലൂടെ യാത്ര ചെയ്യാൻ അധികൃതർ വാഹനമോടിക്കുന്നവരോട് അഭ്യർഥിച്ചു.
∙ ദുബായ് മെട്രോ സമയം നീട്ടി
അതേസമയം, നാളെ ദുബായ് മെട്രോ സമയം നീട്ടിയതായി ആർടിഎ പ്രഖ്യാപിച്ചിരുന്നു. ദുബായ് മെട്രോ റെഡ് ലൈനും ഗ്രീൻ ലൈനും ഞായറാഴ്ച പുലർച്ചെ 3 മുതൽ 12 വരെ പ്രവർത്തിക്കും. മേഖലയിലെ ഏറ്റവും വലിയ കമ്യൂണിറ്റി സൈക്ലിങ് പരിപാടിയായ ദുബായ് റൈഡിന്റെ അഞ്ചാം പതിപ്പാണ് നാളെ നടക്കുക. പ്രായമോ കഴിവോ പരിഗണിക്കാതെ ഇരുചക്രവാഹനങ്ങളിൽ ദുബായ് നഗരത്തിലൂടെ ആസ്വദിച്ച് സവാരി നടത്താനുള്ള അവസരമാണ് പരിപാടിയിലൂടെ ആളുകൾക്ക് ലഭിക്കുക.
