മകളെ കൊലപ്പെടുത്തിയത് താനാണെന്ന് സനു മോഹന് ചോദ്യം ചെയ്യലില് സമ്മതിച്ചതായി പൊലീസ്
കൊച്ചി: 13കാരി മകള് വൈഗയെ പുഴയിലേക്ക് തള്ളിയിട്ടത് താനെന്ന് പിതാവ് സനുമോഹന് പൊലീസിനോട് സമ്മതിച്ച സാഹചര്യത്തില് കൊലകുറ്റത്തിന് കേസ്. മകളെ കൊലപ്പെടുത്തിയത് താനാണെന്ന് സനു മോഹന് ചോദ്യം ചെയ്യലില് സമ്മതിച്ചതായി പൊലീസ് പറഞ്ഞു. കുഞ്ഞിനെ കൊലപ്പെടുത്തിയ ശേഷം ആത്മഹത്യ ചെയ്യാനായിരുന്നു തീരുമാനമെന്നും എന്നാല് തനിക്ക് അതിന് കഴിഞ്ഞില്ലെന്നും സനു മോഹന് പൊലീസിനോട് സമ്മതിച്ചു.
മാര്ച്ച് 21 ന് ഭാര്യയെ ഭാര്യവീട്ടിലാക്കിയ ശേഷം മകളെയും കൊണ്ട് കങ്ങരപ്പടിയിലെ ഫ്ലാറ്റിലെത്തി. അവിടെ വെച്ച് തനിക്ക് വലിയ രീതിയിലുള്ള കടബാധ്യതകളുണ്ടെന്നും അതിനാല് താന് ആത്മഹത്യ ചെയ്യാന് പോകുകയാണെന്നും തന്റെ കൂടെ വരണമെന്നും മകളോട് പറഞ്ഞു. അപ്പോള് അമ്മയെന്ത് ചെയ്യുമെന്ന് മകള് ചോദിച്ചു. അമ്മയെ വീട്ടുകാര് നോക്കിക്കൊള്ളുമെന്ന് പറഞ്ഞ് മകളെ കെട്ടിപ്പിടിച്ച് കരഞ്ഞു. ആ സമയത്ത് മകളെ ശ്വാസംമുട്ടിക്കുകയായിരുന്നു. അതോടെ മകള് അബോധാവസ്ഥയിലായി- സനുമോഹന്റെ മൊഴിയില് പറയുന്നു.
അതിന് ശേഷം വൈഗയെ തുണിയില് പൊതിഞ്ഞ് കാറില് കയറ്റി മുട്ടാര് പുഴയുടെ തീരത്ത് കൊണ്ടുവന്ന് അവിടെയുള്ള ഒരു കലുങ്കില് നിന്ന് താഴേക്ക് തള്ളിയിടുകയായിരുന്നു. പിന്നീട് ആത്മഹത്യ ചെയ്യണമെന്നായിരുന്നു കരുതിയത്. അതിന് സാധിച്ചില്ല. പക്ഷേ ആത്മഹത്യ ചെയ്യണമെന്ന് കരുതിയാണ് അവിടെ നിന്ന് പോയത്. പലയിടങ്ങളില് പോയി. രണ്ടുമൂന്നുതവണ ആത്മഹത്യാശ്രമം നടത്തി. കൈ ഞരമ്പ് മുറിച്ചു, ട്രെയിനിന് മുന്നില് ചാടാന് ശ്രമിച്ചു, കടലില് ചാടാന് ശ്രമിച്ചു. ബീച്ചില് വെച്ച് ഒരു കോസ്റ്റ് ഗാര്ഡ് രക്ഷപ്പെടുത്തി. അങ്ങനെ മൂന്നുതവണ ആത്മഹത്യ ശ്രമങ്ങള് നടത്തിയെന്ന് സനുമോഹന് പൊലിസിന് മൊഴി നല്കി.
കൊച്ചിയിലെ രഹസ്യ കേന്ദ്രത്തില് വച്ചായിരുന്നു ചോദ്യം ചെയ്യല്. നിലവില് ഭര്ത്താവിനെ കാണാനില്ലെന്ന് കാണിച്ച് തൃക്കാക്കര പൊലിസില് ഭാര്യ നല്കിയ പരാതി പ്രകാരം മാത്രം മാണ് പൊലിസ് കേസെടുത്തിരുന്നത്. കഴിഞ്ഞ ദിവസം കര്ണ്ണാടകയിലെ കാര്വാറില് നിന്നാണ് സനുമോഹനെ പൊലീസ് പിടികൂടിയത്. മകളെ കൊലപ്പെടുത്തിയ കുറ്റത്തിന് ഇയാള്ക്കെതിരെ പൊസിസ് ഇന്നലെ കേസെടുത്തിരുന്നു. സനുമോഹന്റെ അറസ്റ്റ് പൊലീസ് രേഖപ്പെടുത്തി.
