റിയാദ് : സമ്പദ്‌വ്യവസ്ഥയും പരിസ്ഥിതി സംരക്ഷണവും പ്രോത്സാഹിപ്പിക്കുന്നതിനായി ദേശീയ ചെങ്കടൽ സുസ്ഥിര പദ്ധതി ആരംഭിച്ച് സൗദി അറേബ്യ. കഴിഞ്ഞ ദിവസമാണ് കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ ദേശീയ ചെങ്കടൽ സുസ്ഥിര പദ്ധതി അനാവരണം ചെയ്തത്.ചെങ്കടലിനെ സംരക്ഷിക്കുക, പ്രാദേശിക സമൂഹങ്ങളെ ശാക്തീകരിക്കുക, സൗദി വിഷൻ 2030, ഗവേഷണം, വികസനം, സുസ്ഥിര പരിസ്ഥിതി എന്നിവയാണ് സംരംഭം ലക്ഷ്യമിടുന്നത്.
സുസ്ഥിരതയും പരിസ്ഥിതി സംരക്ഷണവും ഉയർത്തിപ്പിടിച്ചുകൊണ്ട് സൗദി അറേബ്യയുടെ വിപുലമായ സാമ്പത്തിക, ഭൂമിശാസ്ത്ര, സാംസ്കാരിക സാധ്യതകൾ തുറക്കുന്നതിനുള്ള ശ്രമങ്ങളെ കിരീടാവകാശി ഊന്നിപ്പറഞ്ഞു. രാജ്യത്തിന്റെ വൈവിധ്യമാർന്ന സമ്പദ്‌വ്യവസ്ഥയുടെ പ്രധാന ഘടകമായി നീല സമ്പദ്‌വ്യവസ്ഥ സ്ഥാപിക്കുന്നതിൽ സുപ്രധാനമായ തന്ത്രമാണെന്ന് അദ്ദേഹം വിശേഷിപ്പിച്ചു.
ചെങ്കടലിന്റെ തീരവും സമൂഹങ്ങളും സംരക്ഷിക്കുന്നതിനുള്ള കൂട്ടായ ശ്രമങ്ങൾക്ക് അദ്ദേഹം ആഹ്വാനം ചെയ്തു. 186,000 ചതുരശ്ര കിലോമീറ്റർ വിസ്തൃതിയുള്ള ചെങ്കടൽ, 1,800 കിലോമീറ്റർ നീളമുള്ള തീരപ്രദേശം, ലോകത്തിലെ ഏറ്റവും ജൈവവൈവിധ്യമുള്ള പ്രദേശങ്ങളിലൊന്നാണ്. നാലാമത്തെ വലിയ ബാരിയർ റീഫ് സിസ്റ്റവും, ആഗോള പവിഴപ്പുറ്റുകളുടെ 6.2%, നൂറുകണക്കിന് ദ്വീപുകൾ എന്നിവയും ഇവിടെയുണ്ട്. ഭാവി തലമുറകൾക്ക് അവയുടെ ആസ്വാദനവും സുസ്ഥിരതയും ഉറപ്പാക്കിക്കൊണ്ട് ഈ പ്രകൃതി നിധികളെ സംരക്ഷിക്കുന്നതിനും പുനരുജ്ജീവിപ്പിക്കുന്നതിനുമുള്ള സമഗ്രമായ ചട്ടക്കൂടാണ് പദ്ധതി രൂപപ്പെടുത്തുന്നത്.
ടൂറിസം, മത്സ്യബന്ധനം, പുനരുപയോഗ ഊർജം, ജലശുദ്ധീകരണം, ഷിപ്പിങ്, വ്യവസായം തുടങ്ങിയ വിവിധ സമുദ്ര മേഖലകളിൽ ഈ മാറ്റം നിക്ഷേപ അവസരങ്ങൾ സൃഷ്ടിക്കും. സമുദ്ര, തീരദേശ സംരക്ഷിത മേഖലകൾ 3% മുതൽ 30% വരെ വികസിപ്പിക്കുക, ഊർജ്ജ മിശ്രിതത്തിന്റെ 50% വരെ പുനരുപയോഗ ഊർജത്തിന്റെ സംഭാവന വർധിപ്പിക്കുക, ആയിരക്കണക്കിന് പുതിയ തൊഴിലവസരങ്ങൾ സൃഷ്ടിക്കുക എന്നിവ ലക്ഷ്യമിടുന്നു. കൂടാതെ ദേശീയ ജിഡിപിയിൽ കാര്യമായ സംഭാവനകൾ നൽകുമെന്ന് പ്രതീക്ഷിക്കുന്ന തീരദേശ വിനോദസഞ്ചാരത്തിൽ സൗദി അറേബ്യയുടെ ഗണ്യമായ നിക്ഷേപം സംരക്ഷിക്കാൻ ഇത് ശ്രമിക്കും. പരിസ്ഥിതി സുസ്ഥിരത, സാമ്പത്തിക വികസനം, സാമൂഹിക വികസനം, സുരക്ഷ, ഭരണവും സഹകരണവും എന്നീ അഞ്ച് പ്രധാന ലക്ഷ്യങ്ങളെ അടിസ്ഥാനമാക്കിയുള്ളതാണിത്.
