കുവൈത്ത്‌സിറ്റി : കുവൈത്തിൽ പുതിയ ഗതാഗത നിയമ ഭേദഗതികളെ കുറിച്ച് പൊതുജനങ്ങളില്‍ ബോധവല്‍ക്കരണം നടത്തുന്നതിന്റെ ഭാഗമായി ആഭ്യന്തര മന്ത്രാലയം വിപുലമായ പദ്ധതികള്‍ ആരംഭിച്ചു. പൗരന്മാര്‍ക്കും വിദേശികള്‍ക്കും പുതിയ ഗതാഗത നിയമം മനസ്സിലാക്കാന്‍ അറബിക് കൂടാതെ ആറു ഭാഷകളിലാണ് ക്യാംപെയ്ൻ നടത്തുന്നത്. ഇംഗ്ലിഷ്, ഹിന്ദി, ബംഗാളി, ഉറുദു, ഫാര്‍സി, തഗാലോക് എന്നീ ഭാഷകളിലാണ് ബോധവല്‍ക്കരണം. റോഡ് സുരക്ഷ വര്‍ധിപ്പിക്കുക, നിയന്ത്രണങ്ങള്‍ പാലിക്കപ്പെടുന്നുണ്ടോ എന്ന് ഉറപ്പ് വരുത്തി അപകടങ്ങള്‍ കുറയ്ക്കുക എന്നാതാണ് ആഭ്യന്തര മന്ത്രാലയം ലക്ഷ്യമിടുന്നത്.പ്രിന്റ്-ദൃശ്യ മാധ്യമങ്ങള്‍,സമൂഹ മാധ്യമങ്ങള്‍, മാളുകള്‍ തുടങ്ങിയ പ്രധാന സ്ഥലങ്ങള്‍ കേന്ദ്രീകരിച്ചും ബോധവല്‍ക്കരണം നടത്തും. വിവിധ ഭാഷകളില്‍ വിഡിയോ പ്രചാരണവും ഒരുക്കിയിട്ടുണ്ട്.
അഞ്ച് പതിറ്റാണ്ട് പഴക്കമുള്ള ഗതാഗത നിയമം കഴിഞ്ഞ ദിവസമാണ് ഭേദഗതി ചെയ്ത് ഉത്തരവ് ഇറക്കിയത്. നമ്പര്‍ 5-2025 ഉത്തരവ് പ്രകാരമുള്ള ഗതാഗത നിയമം ഏപ്രില്‍ 22 മുതൽ പ്രാബല്യത്തില്‍ വരും. കടുത്ത പിഴ ശിക്ഷയും ഗുരുതര ലംഘനങ്ങള്‍ക്ക് ജയില്‍ വാസവുമാണ് ശിക്ഷ.
