നേരിയ ഭൂരിപക്ഷത്തിലെങ്കിലും യുഡിഎഫ് അധികാരത്തില് വരുമെന്നായിരുന്നു കോണ്ഗ്രസ് വിലയിരുത്തല്. കെപിസിസി നേതൃത്വം ഈ വിവരം ഹൈ ക്കമാന്ഡിനെ അറിയിച്ചിരുന്നു. എന്നാല് വലിയ പരാജയമാണ് മുന്നണിക്ക് സ്ംസ്ഥാനത്ത് നേരിടേണ്ടിവന്നത്
ന്യൂഡല്ഹി : കേരളത്തില് യുഡിഎഫിനും കോണ്ഗ്രസിനും ഉണ്ടായ വലിയ തോല്വി പാര്ട്ടി ദേശീയ നേതൃത്വത്തെ അമ്പരപ്പിച്ചു. നേരിയ ഭൂരിപക്ഷത്തിലെങ്കിലും യുഡിഎഫ് അധികാരത്തില് വരുമെന്നായിരുന്നു കോണ്ഗ്രസ് വിലയിരുത്തല്. കെപിസിസി നേതൃത്വം ഈ വിവരം ഹൈ ക്കമാന്ഡിനെ അറിയിച്ചിരുന്നു. എന്നാല് വലിയ പരാജയമാണ് മുന്നണിക്ക് സ്ംസ്ഥാനത്ത് നേരിടേണ്ടിവന്നത്. അതേസമയം കോണ്ഗ്രസില് നേതൃമാറ്റം വേണമെന്നാവശ്യം കൂടുതല് ശക്തമാകും. തെരഞ്ഞെടുപ്പിന് മുമ്പും ശേഷവും പാര്ട്ടിയില് നേതൃമാറ്റം വേണമെന്ന് ഒരു വിഭാഗം നിരന്തരം ആവശ്യപ്പെട്ടിരുന്നു. തെരഞ്ഞെടുപ്പ് വിജയത്തിന് ശേഷം ഈ ആവശ്യം ശക്തമാക്കാനുള്ള ആലോചനയിലായിരുന്നു നേതാക്കളായ കെ മുരളീധരനും കെ സുധാകരനും. എന്നാല് നേതാളുടെ കണക്ക് കൂട്ടലുകള് തെറ്റിച്ച് പാര്ട്ടിക്കും മുന്നണിക്കും ദയനീയ പരാജയമാണ് സംസ്ഥാനത്ത് നേരിടേണ്ടി വന്നത്.
രാഹുല് ഗാന്ധി നേരിട്ടെത്തി തെരഞ്ഞെടുപ്പ് പ്രചാരണത്തിന് നേതൃത്വം നല്കിയെങ്കിലും പ്രതിക്ഷിച്ച നേട്ടമുണ്ടാക്കാനായില്ല. രാഹുല് നിശ്ചയിച്ച സ്ഥാനാര്ഥികള്ക്കും കാര്യമായ നേട്ടം ഉണ്ടാക്കാനായില്ല. മിക്ക മണ്ഡലങ്ങളിലും രാഹുല് ഗാന്ധിയും പ്രിയങ്കയും റോഡ് ഷോയും പ്രചാരണങ്ങളും നടത്തി. എന്നാല് പാര്ട്ടി ദേശീയ നേതാക്കളുടെ പ്രചാരണങ്ങള് തെരഞ്ഞെടുപ്പില് പ്രതിഫലിച്ചില്ല എന്നത് ഹൈക്കമാന്ഡിനെ അത്ഭുതപ്പെടുത്തി. രാഹുല് ഉയര്ത്തിയ ആരോപണങ്ങളും വോട്ടര്മാര് കണക്കിലെടുത്തില്ല.
സംസ്ഥാനത്തെ കോണ്ഗ്രസ് സംഘടന സംവിധാനം പൂര്ണമായി പരാജയപ്പെട്ടെന്നാണ് ഹൈക്കമാഡിന്റെ വിലയിരുത്തല്. പ്രതിപക്ഷമെന്ന നിലയിലുള്ള പ്രവര്ത്തനവും പരാജയമാണെന്നാണ് എഐസിസി യുടെ വിലയിരുത്തല്. പാര്ട്ടിയുടെ ദയനീയ പരാജയം സംസ്ഥാനത്ത് നേതൃമാറ്റം വേണമെന്ന ആവശ്യത്തിന് കൂടുതല് ശക്തപ്പെടാനുള്ള സാധ്യത തള്ളിക്കളയാനാവില്ലെന്ന് നേതാക്കള് ചൂണ്ടിക്കാട്ടുന്നു.
