അബുദാബി: ഇറാൻ-ഇസ്രയേൽ സംഘർഷം രൂക്ഷമായ സാഹചര്യത്തിൽ, യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുല്ല ബിൻ സായിദ് അൽ നഹ്യാൻ വിവിധ രാജ്യങ്ങളിലെ വിദേശകാര്യ മന്ത്രിമാരുമായി ഫോണിൽ സംസാരിച്ചു. ഇന്ത്യൻ വിദേശകാര്യ മന്ത്രി എസ്. ജയശങ്കർ, പാക്കിസ്ഥാൻ ഉപപ്രധാനമന്ത്രിയും വിദേശകാര്യ മന്ത്രിയുമായ മുഹമ്മദ് ഇഷാഖ് ദർ, ഇറ്റലി ഉപപ്രധാനമന്ത്രിയും വിദേശകാര്യ മന്ത്രിയുമായ അന്റോണിയോ തജാനി, തുർക്കി വിദേശകാര്യ മന്ത്രി ഹകാൻ ഫിദാൻ, ഹംഗറി വിദേശകാര്യ മന്ത്രി പീറ്റർ സിജാർട്ടോ, സിറിയ വിദേശകാര്യ മന്ത്രി അസദ് അൽ-ഷിബാനി എന്നിവരുമായാണ് ഷെയ്ഖ് അബ്ദുല്ല സംസാരിച്ചത്.
ഈ സംഭാഷണങ്ങളിൽ, ഇസ്രയേൽ-ഇറാൻ സംഘർഷത്തിന്റെ മേഖലാ സുരക്ഷയിലും അന്താരാഷ്ട്ര സമാധാനത്തിലും ഉണ്ടാക്കുന്ന പ്രത്യാഘാതങ്ങൾ ചർച്ച ചെയ്യപ്പെട്ടു. സംഘർഷം കൂടുതൽ വ്യാപിക്കാതിരിക്കാൻ നയതന്ത്രപരമായ പരിഹാരങ്ങൾ തേടേണ്ടതിന്റെ ആവശ്യകത ഷെയ്ഖ് അബ്ദുല്ല ഊന്നിപ്പറഞ്ഞു.
ഇറാന്റെ വിദേശകാര്യ മന്ത്രി അബ്ബാസ് അറാഘ്ചിയുമായി നടത്തിയ ഫോണൽ സംഭാഷണത്തിൽ, ഇസ്രയേലിന്റെ സൈനിക ആക്രമണത്തെ യുഎഇ ശക്തമായി അപലപിച്ചു. ഇത് ഇറാന്റെ സ്വതന്ത്രതയ്ക്കും അന്താരാഷ്ട്ര നിയമങ്ങൾക്കും എതിരാണെന്ന് ഷെയ്ഖ് അബ്ദുല്ല അഭിപ്രായപ്പെട്ടു.
ഇന്ത്യൻ വിദേശകാര്യ മന്ത്രി എസ്. ജയശങ്കറുമായുള്ള ഫോണൽ സംഭാഷണത്തിൽ, മേഖലയിൽ സമാധാനം നിലനിർത്താൻ നയതന്ത്ര ശ്രമങ്ങൾ ശക്തിപ്പെടുത്തേണ്ടതിന്റെ ആവശ്യകത ചർച്ചയായി.
യുഎഇയുടെ ഈ നയതന്ത്ര നീക്കങ്ങൾ, ഇസ്രയേൽ-ഇറാൻ സംഘർഷം കൂടുതൽ രൂക്ഷമാകാതിരിക്കാൻ അന്താരാഷ്ട്ര സമൂഹം ചേർന്ന് പ്രവർത്തിക്കേണ്ടതിന്റെ ആവശ്യകതയെ സൂചിപ്പിക്കുന്നു.
