ജനീവ: കോവിഡ് മാഹാമാരിക്കെതിരായ പ്രതിരോധപ്രവര്‍ത്തനങ്ങള്‍, വിഷയത്തില്‍ ലോകരാജ്യങ്ങളുടെ പ്രതികരണങ്ങള്‍ തുടങ്ങിയവ അവലോകനം ചെയ്യാന്‍ സ്വതന്ത്ര പാനല്‍ ( IPPR-Independent Panel for Pandemic Preparedness and Response) രൂപീകരിക്കാന്‍ തൂരുമാനിച്ചതായി ലോകാരോഗ്യ സംഘടന.
മുൻ ന്യൂസിലന്‍റ് പ്രധാനമന്ത്രി ഹെലൻ ക്ലാർക്ക്, മുന്‍ ലൈബീരിയന്‍ പ്രസിഡന്‍റ് എലെന്‍ ജോണ്‍സണ്‍ സര്‍ലീഫ് എന്നിവര്‍ പാനലിന് നേതൃത്വം നല്‍കുമെന്ന് ഡബ്ല്യൂ.എച്ച്.ഒ ഡയറക്ടര്‍ ജനറല്‍ ടെഡ്രോസ് അഥനോം ഗബ്രിയേസസ് അറിയിച്ചു. ലോകാരോഗ്യ സംഘടനയുടെ 194 അംഗരാജ്യങ്ങളുടെ പ്രതിനിധികളുമായി നടത്തിയ വെര്‍ച്വല്‍ മീറ്റീങ്ങിലൂടെയാണ് ഇരുവരെയും തെരഞ്ഞെടുത്തത്.
നവംബറില്‍ നടക്കുന്ന ആരോഗ്യ മന്ത്രിമാരുടെ വാര്‍ഷിക സമ്മേളനത്തില്‍ പാനല്‍ ഇടക്കാല റിപ്പോര്‍ട്ട് സമര്‍പ്പിക്കും. അടുത്ത വര്‍ഷം മെയില്‍ ഇതുസംബന്ധിച്ച പൂര്‍ണ റിപ്പോര്‍ട്ട് പാനല്‍ അവതരിപ്പിക്കുമെന്നും ടെഡ്രോസ് വ്യക്തമാക്കി.
