Web Desk
ജമെെക്ക: കരീബിയന് ക്രിക്കറ്റിന്റെ പിതാവെന്ന് അറിയപ്പെട്ടിരുന്ന വെസ്റ്റിന്ഡീസിന്റെ ഇതിഹാസ ബാറ്റ്സ്മാന് എവര്ട്ടണ് വീക്ക്സ് (95) അന്തരിച്ചു. വെസ്റ്റിന്ഡീസ് ക്രിക്കറ്റ് വീക്ക്സിന്റെ മരണവാര്ത്ത ട്വീറ്റ് ചെയ്തിട്ടുണ്ട്. “മഹാത്മാവിന്റെ നിര്യാണത്തില് ഞങ്ങളുടെ ഹൃദയം വിങ്ങുകയാണ്. ഒരു ഇതിഹാസം, ഞങ്ങളുടെ നായകന്, സര് എവര്ട്ടണ് വീക്കെസ്. അദ്ദേഹത്തിന്റെ ആത്മാവിന് നിത്യശാന്തി ലഭിക്കട്ടെ”- വിന്ഡീസ് ക്രിക്കറ്റിന്റെ ട്വീറ്റില് പറയുന്നു.
രണ്ടാം ലോക മഹായുദ്ധാനന്തര വിന്ഡീസ് ടീമില് ഇദ്ദേഹം അംഗമായിരുന്നു. ഇതിഹാസങ്ങളായ ക്ലൈഡ് വാല്കോട്ട്, ഫ്രാങ്ക് വോറല് എന്നിവരും വീക്ക്സിനൊപ്പം ഈ ടീമില് കളിച്ചിരുന്നു. വാല്കോട്ട് 2006ലും വോറല് 1967ലും മരണപ്പെട്ടു. മൂവര്ക്കുമുള്ള ആദരവായി ഇന്ന് ബ്രിഡ്ജ്ടൗണിലെ ദേശീയ സ്റ്റേഡിയം ‘ത്രീ ഡബ്ല്യുസ് ഓവല്’ എന്ന് പുനര്നാമകരണം ചെയ്തു.
1948നും 58നും ഇടയില് വെസ്റ്റ് ഇന്ഡീസിനായി 48 ടെസ്റ്റുകള് കളിച്ച അദ്ദേഹം 58.61 ശരാശരിയില് 4455 റണ്സ് നേടി. 207 ആണ് ഉയര്ന്ന സ്കോര്. തുടര്ച്ചയായി അഞ്ചെണ്ണം ഉള്പ്പെടെ 15 സെഞ്ചുറികളും 19 അര്ദ്ധസെഞ്ചുറികളുമാണ് അദ്ദേഹം നേടിയത്.
