ന്യൂഡല്ഹി: രാജ്യത്തെ വാഹനങ്ങളുടെ ഉപയോഗത്തിന് കാലാവധി പ്രഖ്യാപിച്ച് കേന്ദ്രം. യൂണിയന് ബജറ്റ് അവതരണ വേളയില് കേന്ദ്രമന്ത്രി നിര്മലാ സീതാരാമനാണ് ഇക്കാര്യം വ്യക്തമാക്കിയത്. സ്വകാര്യ വാഹനങ്ങള് ഉപയോഗിക്കുന്നതിനുള്ള പരമാവധി കാലാവധി 20 വര്ഷവും വാണിജ്യ വാഹനങ്ങളുടെ കാലാവധി 15 വര്ഷവുമാണ്.
ഗതാഗത യോഗ്യമല്ലാത്ത വാഹനങ്ങള് പൊളിച്ചു കളയാന് സ്ക്രാപ്പിംഗ് പോളിസിയും ബജറ്റ് പ്രഖ്യാപിച്ചു. സ്വകാര്യ വാഹനങ്ങള് 20 വര്ഷം കഴിഞ്ഞും, കൊമേഴ്സ്യല് വാഹനങ്ങള് 15 വര്ഷം കഴിഞ്ഞും ഫിറ്റ്നസ് ടെസ്റ്റിന് വിധേയമാക്കണം. വ്യക്തികളുടെ താത്പര്യം അനുസരിച്ച് മാത്രമാണ് പോളിസി നടപ്പാക്കുക. 2022 ഏപ്രില് ഒന്നു മുതലാണ് സ്ക്രാപ്പിങ്ങ് പോളിസി നടപ്പാക്കുക.
ഇന്ത്യയില് പുതിയ സ്ക്രാപ്പിങ്ങ് പോളിസി വരുമെന്ന റിപ്പോര്ട്ടുകള് നേരത്തെ പുറത്തു വന്നിരുന്നു. ഇലക്ട്രിക് വാഹനങ്ങളുടെ ഉപയോഗം പരമാവധി കൂട്ടാനും മലിനീകരണം തടയാനുമാണ് പുതിയ പോളിസിയെന്ന് കേന്ദ്രം വ്യക്തമാക്കുന്നു.
അതേസമയം 1,100 കിലോമീറ്റര് ദേശീയപാത പദ്ധതിക്കായി കേരളത്തിന് 65000 കോടി രൂപ അനുവദിച്ചു. കൊച്ചി മെട്രോയുടെ 11.5 കിലോമീറ്റര് ദൂരം വരുന്ന രണ്ടാം ഘട്ടത്തിനായി 1957.05 കോടി രൂപ കേന്ദ്ര വിഹിതം അനുവദിച്ചു. രാജ്യത്തെ പ്രധാന തുറമുഖങ്ങളില് പൊതു സ്വകാര്യ പങ്കാളിത്തം, ഉജ്വല യോജന പദ്ധതിയില് ഒരു കോടി കുടുംബങ്ങളെ കൂടി ഉള്പ്പെടുത്തും.
നൂറ് ജില്ലകളില് കൂടി പാചക വാതക വിതരണ പദ്ധതി വ്യാപിപ്പിക്കും, ജമ്മു കശ്മീന് വാതക പൈപ്പ് ലൈന് പദ്ധതി, സോളാര് എനര്ജി കോര്പ്പറേഷന് ആയിരം കോടി രൂപയുടെ അധിക സഹായം, ഇന്ഷ്വറന്സ് മേഖലയില് വിദേശ നിക്ഷേപം തുടങ്ങിയവയാണ് മറ്റ് സുപ്രധാന ബജറ്റ് നിര്ദേശങ്ങള്.
