കൊല്ലം: ഉത്ര വധക്കേസില് ഡിസംബര് ഒന്നിന് വിചാരണ ആരംഭിക്കും. ഇതിന് മുന്നോടിയായി കുറ്റപത്രം കൊല്ലം ജില്ലാ സെഷന്സ് കോടതിയില് വായിച്ചു കേള്പ്പിച്ചു. കുറ്റപത്രം വായിച്ചു കേള്പ്പിച്ച ഘട്ടത്തില് പ്രതി സൂരജ് കുറ്റം നിഷേധിക്കുകയും ചെയ്തു. നേരത്തെ അടൂര് പറക്കോടുള്ള വീട്ടില് തെളിവെടുപ്പിനെത്തിച്ചപ്പോള് മാധ്യമങ്ങള്ക്ക് മുന്നില് സൂരജ് കുറ്റം സമ്മതിച്ചിരുന്നു.
അതേസമയം സൂരജ് സമര്പ്പിച്ച ജാമ്യാപേക്ഷയും വിചാരണ കോടതി തള്ളി. ആറ് മാസക്കാലമായി താന് പോലീസ് കസ്റ്റഡിയിലാണെന്നും ജാമ്യം അനുവദിക്കണമെന്നും സൂരജ് ആവശ്യപ്പെട്ടെങ്കിലും കോടതി അപേക്ഷ തള്ളുകയായിരുന്നു.
മെയ് ആറിനാണ് കൊല്ലം അഞ്ചല് സ്വദേശിനിയായ ഉത്രയെ ഭര്ത്താവ് സൂരജ് മൂര്ഖനെ കൊണ്ട് കടിപ്പിച്ചു കൊന്നത്. പാമ്പിനെ പോസ്റ്റ്മോര്ട്ടം ചെയ്തതുള്പ്പെടെ അപൂര്വ്വ അന്വേഷണ നടപടികള് ഉണ്ടായ കേസാണിത്. അതേസമയം സൂരജിന്റെ കുടുംബാംഗങ്ങള് പ്രതികളായ ഗാര്ഹിക പീഡന കേസിലെ കുറ്റപത്രം ഉടന് സമര്പ്പിക്കുമെന്ന് അന്വേഷണ ഉദ്യോഗസ്ഥനായ ജില്ലാ ക്രൈംബ്രാഞ്ച് ഡി.വൈ.എസ്.പി എ.അശോകന് അറിയിച്ചു.
