ന്യൂഡല്ഹി: രാജ്യത്തെ കര്ഷക സമരത്തിന് എത്രയും വേഗം പരിഹാരം കാണണം എന്നാവശ്യപ്പെട്ട് ഐക്യരാഷ്ട്രസഭയുടെ മനുഷ്യാവകാശ സംഘടന രംഗത്ത്. വിഷയത്തില് സര്ക്കാരും പ്രതിഷേധക്കാരും സംയമനം പാലിക്കണമെന്നും പ്രശ്നത്തില് മനുഷ്യാവകാശം ഉറപ്പാക്കി എത്രയും വേഗം പരിഹാരം കാണണമെന്നും സംഘടന ആവശ്യപ്പെട്ടു. സമാധാനപരമായി പ്രതിഷേധങ്ങള്ക്കായി ഒത്തു കൂടാന് എല്ലാവര്ക്കും അവകാശമുണ്ട്. ഇത് സംരക്ഷിക്കപ്പെടണമെന്നും സംഘടന പറഞ്ഞു. വിഷയത്തില് കേന്ദ്രം പ്രതികരിച്ചിട്ടില്ല.
അതേസമയം കാര്ഷിക നിയമങ്ങള് പിന്വലിക്കണം എന്നാവശ്യപ്പെട്ട് കര്ഷക സംഘടകള് ഇന്ന് രാജ്യവ്യാപകമായി ദേശീയ-സംസ്ഥാന പാതകള് ഉപരോധിക്കും. ഉച്ചയ്ക്ക് 12 മണി മുതല് മൂന്ന് മണിവരെയാണ് വാഹനങ്ങള് ഉപരോധിക്കുക. സമാധാനപരമായിരിക്കണം ഉപരോധമെന്ന് സംയുക്ത കിസാന് മോര്ച്ച കര്ഷകരോട് ആവശ്യപ്പെട്ടിട്ടുണ്ട്.
ഉത്തരാഖണ്ഡ്, ഉത്തര്പ്രദേശ്, ഡല്ഹി എന്നിവിടങ്ങളില് വഴിതടയല് ഉണ്ടാവില്ലെന്ന് ഭാരതീയ കിസാന് മോര്ച്ച നേതാവ് രാകേഷ് ടികായത് അറിയിച്ചു. സ്കൂള് ബസുകള്, ആംബുലന്സുകള്, അവശ്യ വസ്തുക്കളുമായി പോകുന്ന വാഹനങ്ങള് എന്നിവ കടത്തിവിടുമെന്നാണ് സംയുക്തകിസാന് മോര്ച്ച അറിയിച്ചത്. മൂന്ന് മണിക്ക് ഒരു മിനിറ്റ് വാഹനങ്ങളുടെ സൈറണ് മുഴക്കി ആയിരിക്കും സമരം സമാപിക്കുക.
