തിരുവനന്തപുരം: തദ്ദേശ തെരഞ്ഞെടുപ്പോടെ യുഡിഎഫ് തകര്‍ന്നെന്ന് ജനങ്ങളെ തെറ്റിദ്ധരിപ്പിക്കാന്‍ മുഖ്യമന്ത്രി ശ്രമിക്കുന്നുവെന്ന് പ്രതിപക്ഷ നേതാവ് രമേശ് ചെന്നിത്തല. രാഷ്ട്രീയ സാഹചര്യത്തിന് അനുസരിച്ച് വിജയം നേടാനായില്ല. കോവിഡ് കാലത്ത് പ്രതിപക്ഷം എന്ന നിലയില്‍ പരിമിതികള്‍ ഉണ്ടായിരുന്നു. ബിജെപിയെ മുഖ്യപ്രതിപക്ഷമാക്കാന്‍ ശബരിമല സമരകാലം മുതല്‍ മുഖ്യമന്ത്രിയും സിപിഐഎമ്മും ശ്രമിക്കുന്നു. തെരഞ്ഞെടുപ്പിന് ശേഷവും കേരളത്തില്‍ മതസ്പര്‍ദ്ധ വളര്‍ത്താന്‍ സിപിഐഎം ശ്രമിക്കുന്നുവെന്ന് രമേശ് ചെന്നിത്തല പറഞ്ഞു.തെരഞ്ഞെടുപ്പിലും അതിന് ശേഷവും വര്‍ഗീയചേരിതിരിവിന് സിപിഐഎം ശ്രമിക്കുന്നുവെന്നും അദ്ദേഹം ആരോപിച്ചു.
ഇന്നത്തെ രാഷ്ട്രീയസാഹചര്യത്തിന് അനുസൃതമായ മുന്നേറ്റം ഉണ്ടായില്ലെന്നേയുള്ളൂ. കോവിഡ് കാലത്തെ പ്രചാരണത്തിന് പരിമിതികള്‍ ഉണ്ടായിരുന്നു. പാളിച്ചകള്‍ തിരുത്തി സര്‍ക്കാരിന്റെ അഴിമതിക്കെതിരെ പോരാട്ടം തുടരുമെന്നും പ്രതിപക്ഷ നേതാവ് പറഞ്ഞു. സന്ദര്‍ഭങ്ങള്‍ക്കനുസരിച്ച് കാര്‍ഡുകള്‍ മാറിക്കളിക്കുന്നയാളാണ്. മുഖ്യമന്ത്രി സ്ഥാനത്തിരുന്ന് ചെയ്യാന്‍ പാടില്ലാത്ത നീചപ്രവൃത്തിയാണ്. യുഡിഎഫിന്റെ കാര്യം തീരുമാനിക്കാന്‍ പിണറായിയുടെ ഉപദേശം വേണ്ടെന്നും ചെന്നിത്തല പറഞ്ഞു.
അതേസമയം, കെപിസിസി പ്രസിഡന്റിന്റെ കാര്യത്തില്‍ ലീഗിന്റെ ഒരു നേതാവും ഇടപെട്ടിട്ടില്ലെന്ന് പി.കെ കുഞ്ഞാലിക്കുട്ടി പറഞ്ഞു. മുഖ്യമന്ത്രിയുടെ ഫെയ്‌സ്ബുക്ക് പ്രസ്താവന നിലവാരമില്ലാത്തതെന്നും കുഞ്ഞാലിക്കുട്ടി പറഞ്ഞു.
