രാജ്യത്തെ വിവിധ സർവകലാശാലകളിലെ ബിരുദ- ബിരുദാനന്തരബിരുദ ഒന്നാംവർഷ വിദ്യാർത്ഥികൾക്കായുള്ള, 2020- 21 അക്കാദമിക് കലണ്ടർ സംബന്ധിച്ച യുജിസി മാർഗ്ഗനിർദ്ദേശങ്ങൾ കേന്ദ്ര വിദ്യാഭ്യാസ മന്ത്രി ശ്രീ രമേഷ് പൊക്രിയാൽ നിഷാങ്ക് ഇന്ന് പുറത്തിറക്കി.
2020 -21 കാലത്തെ ഒന്നാംവർഷ പ്രവേശന നടപടികൾക്ക് 2020 ഒക്ടോബർ അവസാനത്തോടെ പൂര്‍ത്തിയാകും. ശേഷിക്കുന്ന സീറ്റുകളിലേക്കുള്ള പ്രവേശന നടപടികൾ പൂർത്തീകരിക്കേണ്ട അവസാന തീയതി 2020 നവംബർ 30 ആയിരിക്കും.
2020- 2021 അക്കാദമിക് കാലത്തേക്കുള്ള കലണ്ടർ താഴെ കൊടുക്കുന്നു:
- 2020 ഒക്ടോബർ 31 ഓടു കൂടി പ്രവേശന നടപടികൾ പൂർത്തീകരിക്കണം.
- പുതിയ വിദ്യാർഥികൾ (ഒന്നാംവർഷ /സെമസ്റ്റർ) ക്കായുള്ള ക്ലാസുകൾ 2020 നവംബർ ഒന്നിന് ആരംഭിക്കും.
- പരീക്ഷാ തയ്യാറെടുപ്പുകൾ ക്കായി 2021 മാർച്ച് ഒന്നു മുതൽ മാർച്ച് 7 വരെ അവധി.
- 2021 മാർച്ച് 8 മുതൽ 26 വരെ പരീക്ഷകൾ നടത്തും.
- 2021 മാർച്ച് 27 മുതൽ 2021 ഏപ്രിൽ 4 വരെ സെമസ്റ്റർ അവധി.
- അടുത്ത സെമസ്റ്റർ ക്ലാസുകൾ 2021 ഏപ്രിൽ അഞ്ചിന് ആരംഭിക്കും.
- പരീക്ഷാ തയ്യാറെടുപ്പുകൾക്കായി 2021 ഓഗസ്റ്റ് ഒന്നു മുതൽ 8 വരെ അവധി.
- 2021 ഓഗസ്റ്റ് 9 മുതൽ 21 വരെ പരീക്ഷകൾ സംഘടിപ്പിക്കും.
- 2021 ഓഗസ്റ്റ് 22 മുതൽ ഓഗസ്റ്റ് 29 വരെ സെമസ്റ്റർ അവധി.
- ഈ ബാച്ചിന്റെ അടുത്ത അക്കാദമിക് വർഷത്തിന് 2021 ഓഗസ്റ്റ് 30 ന് തുടക്കമാകും.
പ്രവേശന പരീക്ഷാ ഫലപ്രഖ്യാപനം വൈകുന്ന സാഹചര്യത്തിൽ, 2020 നവംബർ 18 ഓടുകൂടി
സർവ്വകലാശാലകൾക്ക് അക്കാദമിക് സെഷനുകൾക്ക് തുടക്കം കുറിക്കാവുന്നതാണെന്ന് യുജിസി അറിയിച്ചു. അധ്യയന പരിപാടികൾ ഓഫ് ലൈൻ ആയോ ഓൺലൈനായോ ഇവ രണ്ടും ചേർത്തോ സംഘടിപ്പിക്കാം.
2020 നവംബർ 30 നുള്ളിൽ പ്രവേശനം റദ്ദാക്കുകയോ മറ്റു സ്ഥാപനങ്ങളിൽ പ്രവേശനം നേടുകയോ ചെയ്ത വിദ്യാർത്ഥികളുടെ മുഴുവൻ ഫീസും അതാത് അക്കൗണ്ടുകളിലേക്ക് നൽകുന്നതാണ്. നിലവിലെ പ്രത്യേക സാഹചര്യം പരിഗണിച്ചാണ് ഈ ഇളവ്.
