നെയ്യാറ്റിന്കരയില് തര്ക്കഭൂമി ഒഴിപ്പിക്കുന്നതിനിടെ ദേഹത്ത് പെട്രോളൊഴിച്ച് തീക്കൊളുത്തി മരിച്ച ദമ്പതികളുടെ മക്കളുടെ സംരക്ഷണം സര്ക്കാര് ഏറ്റെടുക്കും. കുട്ടികള്ക്ക് വീടും ഇവരുടെ വിദ്യാഭ്യാസ ചെലവും സര്ക്കാര് നല്കും. അടിയന്തര നടപടിക്ക് മുഖ്യമന്ത്രി നിര്ദേശിച്ചു. രണ്ട് കുട്ടികളുടെയും സംരക്ഷണം സര്ക്കാര് ഏറ്റെടുക്കുമെന്ന് മുക്യമന്ത്രിയുടെ ഓഫീസാണ് അറിയിച്ചത്.
തര്ക്കഭൂമി ഒഴിപ്പിക്കുന്ന നടപടികള്ക്കിടെയാണ് രാജനും ഭാര്യ അമ്പിളിയും ദേഹത്ത് പെട്രോളൊഴിച്ച് തീകൊളുത്തി മരിച്ചത്. അതേസമയം സംഭവത്തില് ഡിജിപി ലോക്നാഥ് ബെഹ്റ അന്വേഷണം പ്രഖ്യാപിച്ചിട്ടുണ്ട്.
നെയ്യാറ്റിന്കര പോങ്ങില് മൂന്ന് സെന്റ് ഭൂമിയില് ഷെഡ് കെട്ടി താമസിക്കുകയായിരുന്നു രാജനും ഭാര്യയും രണ്ട് ആണ്മക്കളുമടങ്ങുന്ന കുടുംബം. രാജന് ഭൂമി കയ്യേറിയെന്നാരോപിച്ച് അയല്വാസി വസന്ത മുന്സിഫ് കോടതിയില് കേസ് നല്കിയിരുന്നു. ആറ് മാസം മുന്പ് രാജനെതിരെ കോടതി വിധി വന്നു. ഉത്തരവ് നടപ്പാക്കാനായി കോടതിയില് നിന്നുള്ള ഉദ്യോഗസ്ഥരും പൊലീസും എത്തിയപ്പോഴാണ് ആത്മഹത്യാശ്രമം. ഡിസംബര് 22നാണ് സംഭവം നടന്നത്.
