തിരുവനന്തപുരം: സ്ഥലം ഒഴിപ്പിക്കല് നടപടിക്കിടെ തീക്കൊളുത്തി ആത്മഹത്യാ ശ്രമം നടത്തിയ ദമ്പതിമാരില് ഭര്ത്താവ് മരിച്ചു. നെയ്യാറ്റിന്കര പോങ്ങില് സ്വദേശി രാജന് ആണ് മരിച്ചത്. 75 ശതമാനം പൊള്ളലേറ്റിരുന്നു. ഇതേതുടര്ന്ന് ഇരു വൃക്കകളും തകരാറിലായതാണ് മരണകാരണം.
ഇക്കഴിഞ്ഞ ചൊവ്വാഴ്ചയായിരുന്നു സംഭവം. കോടതി ഉത്തരവ് പ്രകാരം ഒഴിപ്പിക്കല് നടപടി നടക്കുന്നതിനിടെയാണ് ദമ്പതിമാരായ രാജനും ഭാര്യ അമ്പിളിയും പെട്രോള് ഒഴിച്ച് തീകൊളുത്തിയത്. ഗുരുതരമായി പൊളളലേറ്റ രാജനെ ഉടന് തന്നെ മെഡിക്കല് കോളേജില് പ്രവേശിപ്പിച്ചിരുന്നു. ഇവിടെവച്ചാണ് അന്ത്യം സംഭവിച്ചത്. ഭാര്യ ചികിത്സയില് തുടരുകയാണ്.
നെയ്യാറ്റിന്കര പോങ്ങില് മൂന്ന് സെന്റ് ഭൂമിയില് ഷെഡ് കെട്ടി താമസിക്കുകയായിരുന്നു രാജനും ഭാര്യയും രണ്ട് ആണ്മക്കളുമടങ്ങുന്ന കുടുംബം. രാജന് ഭൂമി കയ്യേറിയെന്നാരോപിച്ച് അയല്വാസി വസന്ത മുന്സിഫ് കോടതിയില് കേസ് നല്കിയിരുന്നു. ആറ് മാസം മുന്പ് രാജനെതിരെ കോടതി വിധി വന്നു. ഉത്തരവ് നടപ്പാക്കാനായി കോടതിയില് നിന്നുള്ള ഉദ്യോഗസ്ഥരും പോലീസും എത്തിയപ്പോഴാണ് ആത്മഹത്യാശ്രമം.
ആത്മഹത്യാ ഭീഷണി മാത്രമായിരുന്നു ലക്ഷ്യമെന്നും പൊലീസ് ഇടപെട്ടതോടെയാണ് തീകൊളുത്തേണ്ടി വന്നതെന്നും രാജന് മൊഴി നല്കിയിരുന്നു. ഭര്യ അമ്പിളിക്ക് പുറമെ ഇരുവരെയും രക്ഷിക്കാന് ശ്രമിച്ച എഎസ്ഐ അനില് കുമാറിനും പൊള്ളലേറ്റിരുന്നു.
