ലോക പ്രശ്‌സത കൊറിയന്‍ ചലച്ചിത്ര സംവിധായകന്‍ കിംകി ഡുക്ക് അന്തരിച്ചു. കോവിഡാനന്തര ചികിത്സയിലിരിക്കെയാണ് മരണമടഞ്ഞതെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. 59 വയസ്സായിരുന്നു. കാന്‍, ബെര്‍ലിന്‍, വെനീസ് അന്താരാഷ്ട്ര ചലച്ചിത്രമേളകള്‍ക്ക് ശേഷം നവംബര്‍ 20നാണ് ലാത്വിയയില്‍ എത്തിയത്. നിരവധി അന്തര്‍ദേശീയ പുരസ്‌കാരങ്ങള്‍ നേടിയ കിം കി ഡുക്കിന്റെ എല്ലാ ചിത്രങ്ങളും ലോകക്ലാസിക്കുകളായാണ് വിശേഷിപ്പിക്കപ്പെടുന്നത്.
1960 ഡിസംബര്‍ 20-ന് ദക്ഷിണ കൊറിയയിലെ ക്യോങ്‌സങ് പ്രവിശ്യയിലെ ബോംഗ്വയിലാണ് കിം കി ഡുക് ജനിച്ചത്. 1995-ല്‍ കൊറിയന്‍ ഫിലിം കൗണ്‍സില്‍ നടത്തിയ ഒരു മത്സരത്തില്‍ കിം കി ഡുകിന്റെ തിരക്കഥ ഒന്നാം സമ്മാനം നേടിയത് അദ്ദേഹത്തിന് വഴിത്തിരിവായി. സമരിറ്റന്‍ ഗേള്‍, സ്പ്രിംഗ് സമ്മര്‍ ഫോള്‍ വിന്റര്‍ ആന്റ് സ്പ്രിംഗ്, ദ ബോ, പിയാത്തെ, ദി നെറ്റ്, 3 അയേണ്‍ തുടങ്ങിയവയാണ് പ്രധാന ചിത്രങ്ങള്‍. ഇരുപത്തഞ്ചോളം ചിത്രങ്ങള്‍ സംവിധാനം ചെയ്തിട്ടുണ്ട്. ലോകത്തെ പ്രധാന ചലച്ചിത്രമേളകളിലെ ഒഴിച്ചുകൂടാനാകാത്ത സാന്നിധ്യമായിരുന്നു കിം കി ഡുക്ക്.
