ന്യൂഡല്ഹി: ലാവ്ലിന് കേസ് സുപ്രീംകോടതി ഇന്ന് പരിഗണിക്കും. കേസ് പരിഗണിക്കുന്നത് രണ്ടാഴ്ചത്തേക്ക് നീട്ടിവെക്കണമെന്ന് ആവശ്യപ്പെട്ട് സിബിഐ വീണ്ടും കോടതിയില് അപേക്ഷ നല്കിയിട്ടുണ്ട്. ജസ്റ്റിസ് യുയു ലളിത് അധ്യക്ഷനായ ബെഞ്ചാണ് കേസ് പരിഗണിക്കുന്നത്. കേസുമായി ബന്ധപ്പെട്ട ചില രേഖകള് ഹാജരാക്കാന് കൂടുതല് സമയം വേണമെന്നാണ് സിബിഐയുടെ ആവശ്യം. ഇത് രണ്ടാം തവണയാണ് സിബിഐ കേസ് മാറ്റിവെക്കണമെന്ന ആവശ്യവുമായി രംഗത്തെത്തുന്നത്.
രണ്ട് കോടതികള് ഒരേ തീരുമാനമെടുത്ത കേസില് ഹര്ജിയുമായി വരുമ്പോള് ശക്തമായ വാദങ്ങള് സിബിഐക്ക് ഉണ്ടാകണമെന്ന് കേസ് പരിഗണിച്ച ആദ്യ ദിവസം ജസ്റ്റിസ് യു.യു ലളിത് വ്യക്തമാക്കിയിരുന്നു. സിബിഐയുടെ വാദങ്ങള് ഒരു കുറിപ്പായി സമര്പ്പിക്കാനും കോടതി നിര്ദ്ദേശിച്ചിരുന്നു. ഇതനുസരിച്ചുള്ള കുറിപ്പ് നല്കിയെങ്കിലും അതിനൊപ്പം നിരവധി രേഖകള് നല്കിയിട്ടില്ല. അതിന് സമയം വേണമെന്നാണ് സിബിഐ വ്യക്തമാക്കുന്നത്.