മുംബൈ: ഓഹരി വിപണി കുതിപ്പ്‌ തുടരുന്നു. സെന്‍സെക്‌സ്‌ 600 പോയിന്റും നിഫ്‌റ്റി 159 പോയിന്റുമാണ്‌ ഇന്ന്‌ ഉയര്‍ന്നത്‌. 39,574പോയിന്റിലാണ്‌ സെന്‍സെക്‌സ്‌ ക്ലോസ്‌ ചെയ്‌തത്‌. 39,191 പോയിന്റ്‌ ആണ്‌ ഇന്നത്തെ താഴ്‌ന്ന നില. തുടര്‍ച്ചയായ മൂന്നാമത്തെ ദിവസത്തെ മുന്നേറ്റമാണ്‌ ഇന്ന്‌ കണ്ടത്‌.
നിഫ്‌റ്റി 11,650 പോയിന്റിന്‌ മുകളിലേക്ക്‌ ഉയരുകയും ആ നിലവാരത്തില്‍ തന്നെ വ്യാപാരം അവസാനിപ്പിക്കുകയും ചെയ്തു. മികച്ച നിലയില്‍ തുടങ്ങിയ നിഫ്‌റ്റി 11,680 പോയിന്റ്‌ വരെ ഉയര്‍ന്നു. അതിനു ശേഷം 11,662ലാണ്‌ ക്ലോസ്‌ ചെയ്‌തത്‌.
ആഗോള വിപണിയിലെ മുന്നേറ്റത്തിന്റെ പ്രതിഫലനമാണ്‌ ഇന്ത്യന്‍ വിപണിയിലും കണ്ടത്‌. ബാങ്ക്‌ ഓഹരികളാണ്‌ ഇന്ന്‌ പ്രധാനമായും മുന്നേറ്റത്തിന്‌ നേതൃത്വം നല്‍കിയത്‌. നിഫ്‌റ്റി ബാങ്ക്‌ സൂചിക 2.16 ശതമാനം ഉയര്‍ന്നു.
നിഫ്‌റ്റിയില്‍ ഉള്‍പ്പെട്ട 50 ഓഹരികളില്‍ ഭൂരിഭാഗവും ഇന്ന്‌ നേട്ടത്തിലായിരുന്നു. 37 ഓഹരികള്‍ നേട്ടം രേഖപ്പെടുത്തിയപ്പോള്‍ 13 ഓഹരികളാണ്‌ നഷ്‌ടത്തിലായത്‌. ടാറ്റാ മോട്ടോഴ്‌സ്‌, എച്ച്‌ഡിഎഫ്‌സി, അദാനി പോര്‍ട്‌സ്‌, മഹീന്ദ്ര & മഹീന്ദ്ര, ഇന്‍ഡസ്‌ഇന്‍ഡ്‌ ബാങ്ക്‌ എന്നിവയാണ്‌ ഇന്ന്‌ ഏറ്റവും ഉയര്‍ന്ന നേട്ടം രേഖപ്പെടുത്തിയ നിഫ്‌റ്റി ഓഹരികള്‍. ടാറ്റാ മോട്ടോഴ്‌സും എച്ച്‌ഡിഎഫ്‌സിയും ഏഴ്‌ ശതമാനത്തിന്‌ മുകളില്‍ ഉയര്‍ന്നു.
ബ്രിട്ടാനിയ, കോള്‍ ഇന്ത്യ, വിപ്രോ, ഹിന്‍ഡാല്‍കോ, ടാറ്റാ സ്റ്റീല്‍ എന്നിവയാണ്‌ ഉയര്‍ന്ന നഷ്‌ടം രേഖപ്പെടുത്തിയ അഞ്ച്‌ നിഫ്‌റ്റി ഓഹരികള്‍.
