ജിദ്ദ: വനിതാ ഫുട്‌ബോള്‍ ലീഗിന് ഒരുങ്ങി സൗദി അറേബ്യ. 24 ടീമുകളെ ഉള്‍കൊള്ളിച്ചുള്ള ടൂര്‍ണമെന്റ് നടത്തിയാണ് സൗദി ചരിത്രം കുറിക്കുന്നത്. ചാമ്പ്യന്‍സ് ട്രോഫിയും അഞ്ച് ലക്ഷം സൗദി റിയാലിന്റെ ക്യാഷ് പ്രൈസുമായിരിക്കും സൗദി വിമന്‍സ് ഫുട്‌ബോള്‍ ലീഗ് (WFL) ജേതാക്കള്‍ക്ക് ലഭിക്കുക. ചൊവാഴ്ച്ചയാണ് ടൂര്‍ണമെന്റിന്റെ കിക്കോഫ്.
അറുന്നൂറോളം കളിക്കാരാണ് മത്സരത്തിന്റെ ഭാഗമാവുക. ജിദ്ദ, റിയാദ്, ദമ്മാം ഉള്‍പ്പടെയുള്ള പ്രധാന നഗരങ്ങള്‍ ടൂര്‍ണമെന്റില്‍ അണിനിരക്കുന്നുണ്ട്. വനിതാ ലീഗ് ടൂര്‍ണമെന്റ് പ്രഖ്യാപനത്തോടെ, മത്സരത്തിന് വലിയ പിന്തുണയാണ് ലോകത്തിന്റെ വിവിധ കോണുകളില്‍ നിന്നും സൗദിക്ക് ലഭിച്ചുകൊണ്ടിരിക്കുന്നത്.
വലിയ ചവടുവെപ്പാണ് തീരുമാനമെന്നും ഫുട്‌ബോളിലേക്ക് കൂടുതല്‍ വനിതകളെ കൊണ്ടുവരുന്നതിന് ഇത് സഹായകമാകുമെന്ന് സൗദി ഫുട്‌ബോള്‍ ടീം കോച്ച് അബ്ദുല്ല അല്‍യാമി പറഞ്ഞു. കളിക്കാര്‍ക്ക് പുറമെ, മത്സരത്തിന്റെ സംഘാടനത്തിന് പിന്നിലും വനിതകളുടെ പങ്കാളിത്തമുണ്ട്.
