ന്യൂഡല്‍ഹി: ബാബറി മസ്ജിദ് തകര്‍ത്ത കേസില്‍ പ്രതികളെ മുഴുവന്‍ വെറുതെവിട്ട കോടതി വിധിക്കെതിരെ ശശി തരൂര്‍ എംപി. അക്രമാസക്തരായ ഒരു കൂട്ടം ആളുകളെ കൂടുതല്‍ പ്രകോപിതരാക്കുന്നത് ഒരു കുറ്റമല്ലെങ്കില്‍ പിന്നെ ഡല്‍ഹി കലാപ കേസ് എന്തിനാണെന്ന് അദ്ദേഹം ചോദിച്ചു. ട്വിറ്ററിലൂടെയായിരുന്നു ശശി തരൂരിന്റെ വിമര്‍ശനം.
The judge in the #BabriMasjidDemolitionCase seems to be arguing that no one planned the mosque’s destruction & it was a spontaneous act. But surely incitement is a crime? If igniting the hotheads who undertook violence is not chargeable, then what are the Delhi riots cases about?
— Shashi Tharoor (@ShashiTharoor) October 1, 2020
28 വര്‍ഷം പഴക്കമുള്ള കേസിലാണ് ലഖ്‌നൗ പ്രത്യേക കോടതി കഴിഞ്ഞ ദിവസം വിധി പറഞ്ഞത്. പള്ളി തകര്‍ക്കാന്‍ ആരും ആസൂത്രണം ചെയ്തില്ലെന്നും ആകസ്മികമായി തകര്‍ക്കപ്പെട്ടതാണ് എന്നുമാണ് ജഡ്ജി സുരേന്ദര്‍ കുമാര്‍ യാദവ് വിധി പ്രസ്താവത്തില്‍ പറഞ്ഞത്. എല്‍.കെ അദ്വാനി, മുരളി മനോഹര്‍ ജോഷി അടക്കമുള്ള നേതാക്കള്‍ പള്ളി പൊളിക്കലിനെ തടയാനാണ് ശ്രമിച്ചതെന്നും കോടതി അഭിപ്രായപ്പെട്ടു.
മുഴുവന്‍ പ്രതികളെയും വറുതെവിട്ട കോടതി വിധിക്കെതിരെ രാഷ്ട്രിയ-കലാ-സാംസ്‌കാരിക രംഗത്തെ നിരവധി പേരാണ് പ്രതിഷേധവുമായി രംഗത്തെത്തിയത്. 1992 ഡിസംബര്‍ ആറിനാണ് കര്‍സേവകര്‍ ബാബറി പള്ളി പൊളിക്കുന്നത്. മുതിര്‍ന്ന ബിജെപി നേതാവ് എല്‍.കെ അദ്വാനി, മുരളി മനോഹര്‍ ജോഷി, കല്യാണ്‍ സിംഗ്, ഉമാഭാരതി തുടങ്ങി 32 പേരാണ് പ്രതിപ്പട്ടികയില്‍ ഉണ്ടായിരുന്നത്.
