ചെന്നൈ: മുത്തൂറ്റ് ഫിനാന്‍സിന്റെ ഹൊസൂര്‍ ശാഖയില്‍ വന്‍ കവര്‍ച്ച. തോക്കുധാരികളായ മുഖംമൂടി സംഘം ജീവനക്കാരെ ഭീഷണിപ്പെടുത്തി ഏഴു കോടി രൂപയുടെ 25 കിലോ സ്വര്‍ണമാണ് കവര്‍ന്നത്. ബൈക്കിലെത്തിയ ആറംഗ സംഘത്തിന്റെ ദൃശ്യങ്ങള്‍ സ്ഥാപനത്തിലെ സിസിടിവിയില്‍ പതിഞ്ഞെങ്കിലും സ്ഥാപനത്തിലെ സിസിടിവിയുടെ റെക്കോര്‍ഡറും എടുത്താണ് കവര്‍ച്ചാ സംഘം മടങ്ങിയത്.
കൃഷ്ണഗിരി ജില്ലയില്‍ തമിഴ്‌നാട് കര്‍ണാടക അതിര്‍ത്തി പട്ടണമായ ഹൊസൂരില്‍ വെള്ളിയാഴ്ച രാവിലെ 10-നാണ് സംഭവം നടന്നത്. ഭഗല്‍പൂര്‍ റോഡിലെ ബ്രാഞ്ചില്‍ മുഖമൂടി സംഘം ഇരച്ചു കയറുകയായിരുന്നു. സെക്യൂരിറ്റി ജീവനക്കാരനെ അടിച്ചു താഴെയിട്ട സംഘം ജീവനക്കാരെ മുഴുവന്‍ തോക്കിന്‍ മുനയില്‍ നിര്‍ത്തി. പിന്നീട് ബ്രാഞ്ച് മാനേജറില്‍ താക്കോലുകള്‍ കൈക്കലാക്കി. കൊല്ലമെന്നു ഭീഷണിപ്പെടുത്തി ജീവനക്കാരെ ഉപയോഗിച്ചു തന്നെ ലോക്കര്‍ തുറപ്പിച്ചു. 25 കിലോ സ്വര്‍ണവും തൊണ്ണൂറ്റാറായിരം രൂപയും കവര്‍ന്നു.
സമീപത്തെ കടകളിലെ സിസിടിവി ക്യാമറകളില്‍ പതിഞ്ഞ ദൃശ്യങ്ങള്‍ അടിസ്ഥാനത്തിലാണ് അന്വേഷണം പുരോഗമിക്കുന്നത്. മുത്തൂറ്റിന്റെ ഇതേ ശാഖയില്‍ രണ്ടാഴ്ച മുന്‍പും മോഷണ ശ്രമം നടന്നിരുന്നു.
