ന്യൂഡല്‍ഹി: ആരുടേയും അനീതിക്ക് വഴങ്ങില്ലെന്നും സത്യത്താല്‍ അനീതിയെ ജയിക്കുമെന്നും കോണ്‍ഗ്രസ് നേതാവ് രാഹുല്‍ ഗാന്ധി. ഹത്രാസ് സംഭവത്തിന്റെ പശ്ചാത്തലത്തില്‍ ഗാന്ധിജയന്തി ദിനത്തില്‍ രാഹുല്‍ ഗാന്ധിയുടെ ട്വീറ്റ് ചര്‍ച്ചയായിക്കൊണ്ടിരിക്കുകയാണ്.
താന്‍ ഈ ലോകത്തില്‍ ആരെയും ഭയപ്പെടുന്നില്ലെന്നും അസത്യത്തെ എതിര്‍ക്കുമ്പോള്‍ ഉണ്ടാകുന്ന എല്ലാ കഷ്ടപ്പാടുകളും സഹിക്കാന്‍ തയ്യാറാണെന്നും അദ്ദേഹം ട്വിറ്ററില്‍ കുറിച്ചു. ഉത്തര്‍പ്രദേശ് സര്‍ക്കാരിനെയും മുഖ്യമന്ത്രി യോഗി ആദിത്യനാഥിനെയും ഉന്നംവച്ചാണ് രാഹുലിന്റെ ട്വീറ്റ്.
‘मैं दुनिया में किसी से नहीं डरूंगा… मैं किसी के अन्याय के समक्ष झुकूं नहीं, मैं असत्य को सत्य से जीतूं और असत्य का विरोध करते हुए मैं सभी कष्टों को सह सकूं।’
गाँधी जयंती की शुभकामनाएँ।#GandhiJayanti
— Rahul Gandhi (@RahulGandhi) October 2, 2020
ഹത്രാസില്‍ കൂട്ട മാനഭംഗത്തിന് ഇരയായി കൊല്ലപ്പെട്ട പെണ്‍കുട്ടിയുടെ വീട് സന്ദര്‍ശിക്കാന്‍ എത്തിയ രാഹുലിനെയും പ്രിയങ്കയെയും കഴിഞ്ഞ ദിവസം യുപി പോലീസ് തടയുകയും ഇവര്‍ക്കെതിരെ കേസെടുക്കുകയും ഉണ്ടായി. സെക്ഷന്‍ 332, 353, 427, 323, 354 (ബി), 147,148 എന്നീ വകുപ്പുകള്‍ ചുമത്തിയാണ് കേസെടുത്തിരിക്കുന്നത്.
രാഹുലിനെയും പ്രിയങ്കയെയും യുപി പോലീസ് കയ്യേറ്റം ചെയ്യുകയും പെണ്‍കുട്ടിയുടെ കൊലപാതകത്തില്‍ പ്രതിഷേധിച്ച ഭീം ആര്‍മി നേതാവ് ചന്ദ്രശേഖര്‍ ആസാദിനെ വീട്ടുതടങ്കലില്‍ വച്ചതും വിമര്‍ശനങ്ങള്‍ക്ക് വഴിവച്ചു. ഹത്രാസ് സംഭവത്തില്‍ രാജ്യവ്യാപകമായി പ്രതിഷേധം ഉയരുകയാണ്.
