തിരുവനന്തപുരം: കരിപ്പൂര്‍ വിമാനത്താവളത്തിലുണ്ടായ അപകടത്തില്‍ രക്ഷാപ്രവര്‍ത്തനങ്ങള്‍ക്കായി മുന്നിട്ടിറങ്ങിയവരെ അഭിനന്ദിച്ച് മുഖ്യമന്ത്രി പിണറായി വിജയന്‍. തന്റെ ഫേസ്ബുക്ക് പോസ്റ്റിലൂടെയാണ് മുഖ്യമന്ത്രി രക്ഷാപ്രവര്‍ത്തകരെ അഭിനന്ദിച്ചത്.
അപകടം ഉണ്ടായപ്പോള്‍ തന്നെ ദ്രുതഗതിയില്‍ രക്ഷപ്രവര്‍ത്തനങ്ങളില്‍ ഏര്‍പ്പെടാന്‍ ആയത് ദുരന്തത്തിന്റെ വ്യാപ്തി വലിയൊരു അളവ് വരെ കുറയ്ക്കാന്‍ ഇടയാക്കിയെന്ന് മുഖ്യമന്ത്രി പറഞ്ഞു. അപകടത്തില്‍ പരിക്കേറ്റവരെ രക്ഷിക്കാന്‍ കോവിഡ് ഭീതിയും അപകട സാധ്യതയും അവഗണിച്ച് നാട്ടുകാര്‍ മുന്നിട്ടിറങ്ങിയത് സഹജീവി സ്‌നേഹത്തിന്റെ ഉദാത്തമായ അനുഭവമാണെന്ന് അദ്ദേഹം പറഞ്ഞു.
https://www.facebook.com/PinarayiVijayan/posts/3264120463679761
അതേസമയം രക്തദാനത്തിനായി ആശുപത്രിയില്‍ എത്തിച്ചേര്‍ന്നവരെ അഭിനന്ദിക്കാനും മുഖ്യമന്ത്രി മറന്നില്ല. രക്തദാനത്തിനായി എത്തിയ യുവാക്കളുടെ നീണ്ടനിര ദുരന്തത്തിനിടയിലും കേരളത്തിന് ആശ്വാസവും പ്രതീക്ഷയും നല്‍കുന്നതായും അദ്ദേഹം കൂട്ടിച്ചേര്‍ത്തു.
