മുംബൈ: ഓഹരി വിപണി കരകയറ്റം തുടരുന്നു. തിങ്കളാഴ്‌ചത്തെ ഇടിവിനു ശേഷം തുടര്‍ച്ചയായ രണ്ടാം ദിവസമാണ്‌ വിപണി മുന്നേറിയത്‌. ശക്തമായ ചാഞ്ചാട്ടമാണ്‌ വിപണിയില്‍ ദൃശ്യമായത്‌. ഈ മുന്നേറ്റം നിഫ്‌റ്റി വീണ്ടും 11,500 പോയിന്റിന്‌ മുകളിലേക്ക്‌ ഉയരാന്‍ സഹായകമായി. 11,800 പോയിന്റിലാണ്‌ അടുത്ത സമ്മര്‍ദം.
സെന്‍സെക്‌സ്‌ ഇന്ന്‌ 185 പോയിന്റും നിഫ്‌റ്റി 65 പോയിന്റും ഉയര്‍ന്നു. നിഫ്‌റ്റി 11,535 പോയിന്റില്‍ വ്യാപാരം അവസാനിപ്പിച്ചു. 11,430.40 വരെ ഇടിഞ്ഞ നിഫ്‌റ്റി അവിടെ നിന്നും നൂറ്‌ പോയിന്റിലേറെ ഉയരുകയായിരുന്നു. 39,086 പോയിന്റിലാണ്‌ സെന്‍സെക്‌സ്‌ ക്ലോസ്‌ ചെയ്‌തത്‌. 38,736.22 പോയിന്റ്‌ വരെ രാവിലെ സെന്‍സെക്‌സ്‌ ഇടിഞ്ഞിരുന്നു.
നിഫ്‌റ്റിയില്‍ ഉള്‍പ്പെട്ട 37 ഓഹരികള്‍ ഉയര്‍ന്നപ്പോള്‍ 13 ഓഹരികള്‍ ഇടിവ്‌ നേരിട്ടു. സീ ലിമിറ്റഡ്, മഹീന്ദ്ര & മഹീന്ദ്ര, ടാറ്റാ മോട്ടോഴ്‌സ്‌, ഇന്‍ഫ്രാടെല്‍, അദാനി പോര്‍ട്‌സ്‌ എന്നിവയാണ്‌ ഏറ്റവും ഉയര്‍ന്ന നേട്ടം രേഖപ്പെടുത്തിയ അഞ്ച് നിഫ്‌റ്റി ഓഹരികള്‍. സീ ലിമിറ്റഡ് 7.46 ശതമാനം ഉയര്‍ന്നു. മഹീന്ദ്ര & മഹീന്ദ്ര ആറ്‌ ശമാനത്തിലേറെയും ടാറ്റാ മോട്ടോഴ്‌സ്‌ അഞ്ച് ശതമാനത്തിലേറെയും നേട്ടമുണ്ടാക്കി. ഇന്‍ഫ്രാടെല്‍, അദാനി പോര്‍ട്‌സ്‌, പവര്‍ഗ്രിഡ്‌ എന്നീ സൂചികാധിഷ്‌ഠിത ഓഹരികള്‍ മൂന്ന്‌ ശതമാനത്തിന്‌ മുകളില്‍ നേട്ടം രേഖപ്പെടുത്തി.
പ്രധാനമായും ഓട്ടോമൈബൈല്‍, ഐടി മെറ്റല്‍ ഓഹരികളാണ്‌ ഇന്ന്‌ ഏറ്റവും മികച്ച പ്രകടനം കാഴ്‌ച വെച്ചത്‌. നിഫ്‌റ്റി ഓട്ടോ സൂചിക 1.15 ശതമാനം ഉയര്‍ന്നു. നിഫ്‌റ്റി മെറ്റല്‍ സൂചിക 1.79 ശതമാനം നേട്ടമാണ്‌ രേഖപ്പെടുത്തിയത്‌. സെയില്‍ അഞ്ച് ശതമാനത്തോളം മുന്നേറി.
ബജാജ്‌ ഓട്ടോ, ഹീറോ മോട്ടോഴ്‌സ്‌, ഏഷ്യന്‍ പെയിന്റ്‌സ്‌, എച്ച്‌ഡിഎഫ്‌സി, നെസ്‌ളേ ഇന്ത്യ എന്നിവയാണ്‌ നിഫ്‌റ്റിയില്‍ ഏറ്റവും നഷ്‌ടമുണ്ടാക്കിയ ഓഹരികള്‍.
