ജിദ്ദ: ജനിതക മാറ്റം സംഭവിച്ച് കെവിഡ് വൈറസ് ഭീതി നിലനില്‍ക്കുന്ന സാഹചര്യത്തില്‍ മക്കയിലെ ഹറമിലും പ്രതിരോധ പ്രവര്‍ത്തനം ശക്തമാക്കി. വിമാനം റദ്ദാക്കിയത് കാരണം കുടുങ്ങിയ വിദേശികള്‍ക്ക് ഹജ്ജ് മന്ത്രാലയത്തിന്റെ നിര്‍ദേശാനുസരണം എല്ലാവിധ സൗകര്യങ്ങളും ഏജന്‍സികള്‍ ഒരുക്കിയിട്ടുണ്ട്. കോവിഡ് ഭീതി നിലനില്‍ക്കുന്ന സാഹചര്യത്തിലാണ് ഹറമില്‍ ക്രമീകരണം ശക്തമാക്കിയത്.
ലോക്ക്ഡൗണിന് ശേഷം തുറന്ന ഹറമില്‍ നാല്‍പ്പത്തിയഞ്ച് ലക്ഷം പേരാണ് ഉംറ നിര്‍വഹിച്ചത്. നേരത്തെയും ഹറമില്‍ ശക്തമായ ക്രമീകരണങ്ങള്‍ നിലനിന്നിരുന്നു. പുതിയ സാഹചര്യത്തില്‍ ശക്തമായ ജാഗ്രതാ നിര്‍ദേശം നിലനില്‍ക്കുന്നുണ്ട്. കോവിഡ് ഭീതി നിലനില്‍ക്കുന്നതിനാല്‍ കഴിഞ്ഞ ദിവസം വിദേശ രാജ്യങ്ങളില്‍ നിന്നുളള ഉംറ തീര്‍ഥാടകരുടെ വരവ് താല്‍ക്കാലികമായി നിര്‍ത്തിവെച്ചതായി ഹജ്ജ് മന്ത്രാലയം അറിയിച്ചിരുന്നു. ഇനിയൊരു അറിയിപ്പ് ഉണ്ടാകുന്നതുവരെ ഈ വിലക്ക് നിലനില്‍ക്കുമെന്നും മന്ത്രാലയം വ്യക്തമാക്കി.
അതേസമയം ഈ ആഴ്ച ഉംറക്ക് വവരാന്‍ നിശ്ചയിച്ചിരുന്നവര്‍ക്ക് വിമാന സര്‍വ്വീസ് പുന:രാരംഭിച്ച ശേഷം വരാനാകുമെന്നും അതിനുളള നടപടികള്‍ ഉംറ ഏജന്‍സികളുടെ സഹകരണത്തോടെ സ്വീകരിച്ചു വരികയാണെന്നും മന്ത്രാലയം അറിയിച്ചു.
